Conmoción en Sarreaus ao morrer o matrimonio rescatado pola Garda Civil que os atopou tirados no solo da súa vivenda

Os axentes recibiron a denuncia dos veciños, que levaban días sen ter noticias dos maiores. Ao chegar á vivenda, atopáronos no solo. 

El, de 81 anos, faleceu o venres, mentres que a muller, de 77 anos, morreu na tarde do sábado.

Un matrimonio do concello ourensán de Sarreaus faleceu este fin de semana despois de ser localizado o pasado 24 de novembro pola Garda Civil no solo do seu domicilio tras ser alertados por veciños que non tiñan noticias deles desde varios días antes.

O Instituto Armado recibiu unha chamada de alerta o día 24 ao mediodía na que se lles comunicaba a ausencia destes dous veciños da parroquia de Pazos.

Así, os servizos de emerxencias desprazáronse até o lugar, despois de que os veciños indicasen que non tiñan noticias do matrimonio desde uns días antes.

Ao chegar á vivenda observaron, xa desde o exterior a través dunha porta acristalada, que o home estaba no solo da cociña. Por este motivo, forzaron a porta, pechada desde o interior, e entraron ao domicilio.

Xa dentro, o home, que aínda estaba consciente e era capaz de falar, díxolles que a súa muller se atopaba no baño. Deste xeito, comprobaron que a muller estaba encerrada na estancia e cando accederon, aínda que seguía con vida, xa non podía comunicar.

Ambos foron trasladados en ambulancia até o Complexo Hospitalario Universitario de Ourense, onde faleceron un día despois con poucas horas de diferenza. El, con 81 anos, faleceu nas últimas horas do venres, e ela, con 77, nas primeiras do sábado.

A Garda Civil non atopou signos de violencia nin nada que apuntase a unha intoxicación de monóxido de carbono, tampouco indicios de que se cometeu un roubo, polo que cualificaron a acción de auxilio humanitario.

Así as cousas, polo momento, segundo fontes da Garda Civil, tras a autopsia realizada este pasado fin de semana, descártase unha intoxicación por gas, á espera de que o Instituto Nacional de Toxicoloxía realice as analíticas complementarias.

Os axentes atopáronse a casa en mal estado e aseguran que os residentes, en plenas capacidades mentais, non estaban interesados en recibir axuda dos servizos municipais a pesar de que lles consta que se lles ofreceu en varias ocasións.