Galicia impón máis restricións ao consumo de auga ante a seca

Concellos e institucións manteñen en Galicia o chamamento á concienciación cidadá para facer un uso responsable da auga, evitando consumos innecesarios ante o contexto de seca. Esta situación provocou que cada vez máis municipios da comunidade galega adopten algún tipo de restrición ante unha situación que algún alcalde advirte que podería ser unha "catástrofe" para o seu municipio se segue sen chover.

Así o expuxo, por exemplo, o alcalde de Vilar de Barrio, Manuel Conde. Neste municipio adoptouse, entre outras medidas, a de recorrer a drons "para comprobar quen ten as piscinas cheas e quen non as ten".

Manuel Conde alude a cortes de auga "puntuais" en casas situadas nas zonas máis altas. "É o peor ano hidrolóxico desde que hai datos, as fontes están baixo mínimos e algunha está con fío de auga", explica. O alcalde aludiu tamén ás obras postas en marcha hai uns anos de intercomunicación de depósitos para "traer auga desde onde a hai".

Este municipio só é un exemplo do que está a ocorrer en Galicia. Por este motivo, moitos outros concellos están a adoptar medidas. Este é o caso tamén de Ribadavia, onde se tivo que proceder a realizar cortes de subministracións ante a súa falta no depósito municipal. Neste concello declarouse a emerxencia ante unha situación "crítica".
 

ACTUACIÓNS POR PARTE DOS CONCELLOS

Noutros municipios, as medidas son polo momento, preventivas, fronte ao "posible agravamento". Este é o caso de Lugo, que realiza a limpeza da calzada tan só en días alternos. Nesta provincia, hai xa restricións no consumo en varios concellos e algúns como Sober habilitaron desde hai días camións cisterna para trasladar auga a unha decena de núcleos de poboación.

Hai algúns outros municipios con controis do uso da auga potable na rede municipal, optando por manter regados os espazos verdes e xardíns municipais con auga reutilizada, que non é apta para o consumo.

No municipio coruñés de Miño, —cuxa poboación se ve duplicada no verán, como moitos outros en Galicia—, procedeuse ao peche do subministracións de praias ou á prohibición de usar a da traída pública para baldear ou encher piscinas. Esta mesma media tamén a adoptaron, antes que noutras provincipas, varios municipios ourensáns, que valoran impoñer sancións a quen a incumpra

Esta situación de seca tamén obrigou a impoñer cambios na Festa da auga de Vilagarcía de Arousa, que volverá ás súas orixes usando cubos, pero que prohibiu as mangueiras. As fontes ornamentais do municipio pontevedrés estarán pechadas, aínda que haberá algunhas de botón para poder encher pistolas de auga ou globos.

A falta de choivas provocou que lugares como as ruínas do antigo Portomarín, asolagado polo encoro de Belesar, pódense cruzar a pé despois de que esta localidade leva "anos", segundo apunta o seu alcalde, Pablo Rivas, sen ver o río Miño "con tan baixo caudal". Outro dos lugares que quedou agora visible é o campamento romando situado en Bande, a beiras do río Limia, asolagado habitualmente baixo o encoro das Cunchas.
 

Os ENCOROS, A MENOS DA METADE

A Federación Galega de Municipios e Provincias (Fegamp) admite que hai "preocupación" e incide en que "máis aló" do contexto actual é "imprescindible adquirir unha cultura de aproveitamento dos recursos naturais máis sostible". "Por parte de todos, administracións e cidadanía". "Cónstanos que os concellos se están esforzando polo cambio de patrón entre os seus veciños e veciñas", apostilan.

Desde a Confederación Hidrográfica Miño-Sil expresáronse da mesma maneira. O seu presidente José Antonio Quiroga advertiu hai unha semana da necesidade de actuar ante "o ano hidrolóxico máis seco da serie histórica". Os encoros galegos desta demarcación atópanse a menos da metade da súa capacidade máxima —un 49,28%, un 0,66% menos que a semana anterior—.

"Este volume é un 0,45% menos que a cantidade de auga embalsada hai un ano, 49,73%, e un 19,54% menor que a enchida media histórica nestas datas do ano, 68,82%" precisan desde a Confederación Hidrográfica. "No relativo aos caudais circulantes, o caudal nas estacións da Comunidade atópase de media un 44,5% por baixo da media histórica", inciden.
 

A Xunta ADVIRTE DE QUE A SITUACIÓN PODE "AGRAVARSE"

A Consellería de Infraestruturas afirmou que os niveis dos ríos están "nos índices máis baixos desde que se teñen rexistros na demarcación Galicia-Costa". Por este motivo insisten en que existe unha "ameaza real" ao abastecemento de auga en varias zonas de Galicia.

"O anterior episodio de seca produciuse en novembro e aínda estamos en agosto polo que a situación pode agravarse". Tamén lembran que se declarou a prealerta por seca en febreiro en boa parte da demarcación de competencia autonómica, estendéndose en abril a todos os sistemas da demarcación "como medida preventiva".

En canto ás medidas autonómicas, remítense ás xa postas en marcha polos municipios e ao novo plan de seca da Xunta, aprobado en xuño, para a aplicación das mesmas, segundo a gravidade. Entre estas medidas figura a redución da auga para abastecemento urbano e industrial, ademais da posibilidade de cortes temporais.

Nestes momentos, en Galicia, segundo a Xunta, 104 concellos dispoñen de plans de emerxencia fronte á seca, 46 deles na demarcación Galicia-Costa, aínda que das grandes cidades só Santiago.