Ferrol salgue hoxe á rúa contra os buses que chegan tarde, as poucas frecuencias e os autocares destartalados

Os veciños da cidade departamental e arredores, convocados pola ‘Plataforma por un Transporte Digno en Ferrol e comarca’, protestarán este mércores en Ferrol contra o servizo que ofrece Monbus.

A 'Ruta dous Inocentes' arrinca ás 19 horas ante a estación de autobuses de Ferrol e concluirá ante a casa consistorial. 

Cansados de esperar por un bus que nunca pasa, os veciños de Ferrol decidiron non agardar máis e tomar eles o volante este 28 de decembro, Día dos Santos Inocentes, para denunciar a maior broma pesada para a cidade relacionada co servizo do transporte urbano. "A broma pesada dos recortes continúa", denuncian. 

Despois de ter que desconvocar a cadea humana programada para principios de mes, este mércores os veciños da cidade departamental saen á rúa convocados pola ‘Plataforma por un Transporte Digno en Ferrol e comarca’ para realizar a ‘Ruta dous Inocentes’ coa que pór de manifesto a súa situación. 

O percorrido arrinca ás 19 horas, ante a estación de autobuses, e partirá dirección ao edificio administrativo da Xunta da Praza de España para concluír ante o Concello da cidade. 

Os dardos do colectivo van dirixidos a Monbus , concesionaria das liñas en percorridos como o que conecta Ferrol coa Coruña ou con Santiago de Compostela. Atrasos, buses que non aparecen, autocares moi danados, poucas frecuencias ou exceso de pasaxeiros son algúns dos episodios que denuncian os usuarios de toda a comarca.