A Deputación de Pontevedra acollerá o Encontro de Museología ICOM-España

A Deputación de Pontevedra acollerá do 16 ao 18 de outubro no Museo a cuarta edición do Encontro de Museología ICOM-España, a cita de carácter trienal que reúne a representantes dos principais museos españois para debater sobre a súa realidade, tendencias e perspectivas de futuro.

Pontevedra segue os pasos de Madrid, Valencia e San Sebastián, que foron as sedes das anteriores edicións. Nesta ocasión, segundo informou a institución provincial nun comunicado, o tema a tratar será 'Coleccións almacenadas: (re)definir e (re)organizar. O desafío da sustentabilidade medioambiental e social".

O vicepresidente da Deputación, Rafa Domínguez, destacou que a selección do Museo de Pontevedra como sede "o sitúa nun referente" no ámbito da museología estatal, abrindo novas vías de colaboración e proxectos compartidos.

"Este evento proxecta Pontevedra como unha cidade impulsora de grandes acontecementos culturais", sinalou Domínguez.

Xunto a conferencias, mesas redonda e debates, o programa tamén inclúe unha visita guiada ao Museo e unha xornada de visitas culturais a outros museos galegos.

A inscrición está aberta na páxina web do ICOM. Tamén está aberto o prazo para a presentación de comunicacións, co prazo limitado ao 30 de xuño para a presentación do resumo das propostas.