Viaqua volve apostar polos máis novos co seu programa 'Talento Mozo' con Igaxes
A iniciativa trata de ser unha porta para que os mozos en risco de exclusión poidan acceder á universidade.
A sede de Viaqua de Santiago de Compostela celebrou unha nova edición das bolsas 'Talento Mozo', unha iniciativa que busca dar oportunidades a todos os mozos en risco de exclusión que queren continuar cos seus estudos universitarios. En colaboración con Igaxes, as dúas entidades reforzan o seu compromiso cunha segunda edición desta axuda que consta, para o estudante seleccionado, dunha bolsa anual, durante toda a carreira, por un importe de 1.500€ para cubrir aqueles gastos relacionados cos estudos.
"UNHA SOCIEDADE MÁIS XUSTA"
No acto estiveron presentes Carlos Rosón e Cristina Rozas, por parte de Igaxes, así como Nicolás Esmorís e Laura de Veiga, por parte de Viaqua. Aqueles estudantes cun alto rendemento escolar pero unha situación económica complexa poden optar a esta bolsa despois dos bos resultados da última edición.
"O programa está deseñado para promover a igualdade de oportunidades entre a mocidade con dificultades económicas, pero que conta cunha traxectoria académica brillante", destaca Viaqua no seu comunicado. "Este programa permite aos estudantes acceder a unha formación universitaria, desenvolver habilidades relevantes e potenciar a súa futura inserción laboral, eliminando barreiras económicas e sociais", engadiu Esmorís.
Ao tempo, desde Igaxes agregan que estas iniciativas permiten a moitos mozos seguir desenvolvendo todo o seu potencial grazas a estas axudas que lle dan acceso a libros, material, transporte ou formación complementaria. "Non debería ser un privilexio", di Rosón, "senón un dereito". "Este tipo de alianzas son clave para avanzar cara a unha sociedade máis xusta e equitativa", puntualiza.
O programa conta, ademais, cun plan de seguimento con apoio psicosocial e orientación académica para os beneficiarios, de modo que poidan estar acompañados durante os procesos de matriculación, xestión e desenvolvemento da súa traxectoria. Ademais, este programa tamén permite aos bolseiros participar en seminarios e talleres de diferentes temáticas, así como acceder ao programa de Hábitos Saudables de Viaqua.
Escribe o teu comentario