'Impacto Autónomo' : Subvencións da Xunta que se poden pedir desde hoxe
O motivo destas axudas excepcionais é a inflación que disparou o custo dos combustibles e a enerxía que é clave na economía de moitos traballadores por conta propia.
Precisamente, o Diario Oficial de Galicia (#DOG) publicou este mércores as bases da convocatoria da primeira edición desta iniciativa, que conta cun investimento de 30 millóns de euros e ofrece subvencións directas a autónomos de entre 800 e 1.500 euros para minimizar o impacto da subida de custos en materias primas e subministracións como os enerxéticos.
Tal como informou a Xunta nun comunicado, 'Impacto Autónomo' pretende axudar de forma específica aos autónomos a paliar o custo da vida. Así o expuxo a secretaria xeral de Apoio ao Emprego, Traballo Autónomo e Economía Social, Covadonga Toca, nunha visita que realizou en Lugo á empresa Pampering, dedicada á elaboración de produtos de panadaría e confeitaría.
Os beneficiarios destas axudas serán persoas autónomas dadas de alta no Réxime Especial de Traballadores Autónomos ou no Réxime do Mar, con domicilio en Galicia e con rendementos netos mínimos de 10.000 euros e máximos de 30.000 euros no ano 2021.
No caso de autónomos societarios, a facturación da compañía terá que ser como mínimo de 50.000 euros e non poderá superar os 750.000 euros. A contía da axuda establecerase en función do rendemento e conforme á escala que publica o DOG.
Escribe o teu comentario