​O pleno municipal de Ourense pon en escena o "colapso" da cidade

|

Jesus vazquez ourense


O pleno do Concello de Ourense aprobou solicitar a "urxente colaboración" da Xunta e do Goberno central para asinar convenios e "establecer colaboracións" con outras administracións co obxectivo de impulsar a prestación de servizos e "liquidar o colapso administrativo que sofre" a cidade.


Democracia Ourensana (DO) e PSOE votaron a favor (13 votos), mentres que os dous deputados de Ourense en Común (OUeC) abstivéronse por considerar que "xa existe esa colaboración" con outras administracións. Pola súa banda, o PP votou en contra (10) dunha proposta que cualificou como "un teatrillo para amedrentar a cidadanía".


A proposta inicial presentada por Democracia Ourensana pretendía solicitar a "intervención" do Concello por parte das administracións central e autonómica, aínda que finalmente cambiouse a redacción ante a recomendación dos técnicos municipais que informaron de que non se pode pedir esa actuación se non se cumpren uns requisitos moi concretos.


Nesta liña expresouse a concelleira de Facenda Ana Morenza, que afeou á oposición que para pedir unha intervención un concello ten que ter unha débeda inasumible, incumprir co teito de gasto ou co período medio de pago a provedores.


"UN MODELO PARA ESPAÑA"


Morenza resaltou que desde a toma de posesión de Jesús Vázquez estes tres aspectos melloraron ata o punto de que o Concello pasou de "estar ao bordo dunha intervención social" a converterse "nun exemplo para seguir por todos os Concellos de España".


A portavoz do grupo de goberno insistiu na súa "estupefacción" pola proposta de DO, que definiu como "unha polémica estéril" e "un teatrillo co obxectivo de amedrentar a cidadanía".


Para o portavoz de DO, Gonzalo Pérez Jácome, a proposta é unha "medida excepcional" que reclama debido a "a incapacidade de xestión por parte do peor alcalde da historia de Ourense".


SEN ORZAMENTOS EN TRES ANOS


Entre os motivos que enumerou Jácome para xustificar esta medida apuntou o incumprimento de acordos plenarios, a perda de subvencións e, especialmente, que "en case tres anos non houbo orzamentos nin se presentou un borrador".


Neste punto coincidiu o portavoz socialista Ángel Vázquez Barquero, que afeou ao grupo de goberno que non presentase orzamentos "nin un modelo de cidade" e que na actualidade "estea a traballar cun orzamento prorrogado e con créditos ficticios".


Vázquez Barquero lamentou que o PP presuma de redución da débeda durante a súa xestión por considerar que "todos os alcaldes deberían ser insumisos" ao teito de gasto, que cualificou como unha medida para que as empresas privadas ofrezan os servizos e ocupen o lugar que debería estar a cubrir a administración pública.


O portavoz de DO, Martiño Xosé Vázquez explicou a abstención do seu grupo na pouca ambición da proposta, que inicialmente apostaba por unha intervención do concello e porque "xa se está producindo unha colaboración" coa Xunta e o Goberno central.


relacionada ​Folga na recollida de lixo xusto antes do Entroido
relacionada ​As dependencias municipais teñen concentracións elevadas de radón

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress