Votará o parlamento a independencia ou inmolarase Puigdemont?

O Govern de Puigdemont faise cachizas coa DUI.

Agora si que entramos xa na recta final do desafío de Puigdemont & Junqueras ao Estado de Dereito. A negativa do presidente da Generalitat a intervir no Senado, coa escusa de que non ía servir de nada, que a decisión de aplicar o 155 está xa tomada, caeu como unha xerra de auga fría sobre a cidadanía de Catalunya que aínda cría en "o seny" desta clase política que abandonou as leis e o sentido común.

Entre este xoves e venres, en sede parlamentaria, Puigdemont anunciará a DUI. Votación incluída? Ou sinxelamente vai ao matadoiro el só. Creo que non o poñerá a votación, porque corre o risco que algúns deputados do PDeCat non obedezan as súas ordes. Queda pouco tempo para coñecer o desenlace final da primeira parte do relato programado polos cabezas pensantes do proceso. Eses que están á sombra e que manexaron como ninguén os fíos dunhas marionetas obedientes, con orelleiras e dispostas a pasar á historia. É o máis importante que fixeron nas súas vidas. A cidadanía, que se coide ela soa. Pouco lles importan os sucesos que van vir a continuación. É a hora de tomar as rúas "pacíficamente", cualificativo que xa non se vai poder aplicar, está clarísimo que non será así.

O vicepresidente, Junqueras, nunha entrevista a un medio estranxeiro, dicía que non quedaba máis remedio que proclamar a DUI. Por que? Porque o relato que viñeron utilizando durante tanto tempo debe seguir aplicándose, coas mesmas mentiras que o fixeron ao longo destes anos. O investimento nos medios internacionais para que explicasen o que está a suceder en Catalunya, serviulles ata hai poucos días. Agora, o 90% dos xornalistas déronse conta de que detrás das explicacións, as manipulacións e os agasallos, só había fraude. Ao final toda esta montaxe serviu para que os xornalistas se dean contan da gran mentira predicada. Os colegas non son idiotas, teñen criterio propio e son profesionais.

Junqueras, ao que coñecemos cando mente e está nervioso, nesa entrevista mostrou estas dúas premisas: estaba nervioso e mentiu cunha cara tremendamente dura. Ten claro, como dixemos xa noutras ocasións, que o seu soño de alcanzar a presidencia da Generalitat se esfumou, como outras tantas cousas coas que soñaba.

Mentres, os dous axitadores de masas, non están en activo para cargarse da intendencia das rúas. Agora ese papel vai correr a cargo dos anti sistemas, coas consecuencias que todos imaxinamos. Tan pouco hai que esquecer que, no outro lado da rúa están os da ultradereita que van facer tres cuartos do mesmo. Os extremos sempre se tocan, non o esquezamos.

En todo este proceso, está o papel que van desempeñar os mossos, acatarán as leis? E do resto de funcionarios aos que se lles puxeron nunha situación realmente comprometida xa se verá

E por último, a cidadanía, dividida en dous. Moitos dos cales, dun lado e do outro, con odios, sede de vinganza, medos e moitos deles dispostos a todo. Situación moi preocupante que pode acabar realmente mal.

Estes insensatos dirixentes independentistas van deixar o país nunha situación realmente preocupante e co medo no corpo a todos os cidadáns pola incerteza de moitas cousas.

A prescrición de ansiolíticos aumentou considerablemente- diso non fala o conseller Comín-. O mesmo que o insomnio que están a padecer miles de cataláns.

Dicía Titoo Livio que "Nun pobo libre é máis poderoso o imperio da lei que o dos homes".