O cambio climático empeza a traer peixes tropicais ás augas galegas

Foto do orellán aparecido en Baldaio. Foto: Arco Iris

Colaboradores da Asociación Ecoloxista ARCO IRIS localizaron este mes de agosto no interior da Marisma de Baldaio de Carballo, A Coruña, un exemplar de orellán (ou peixe lúa), un peixe tropical (con nome científico Mola mola), que adoita habitar en augas mornas.

A Asociación explica que o animal se puido desorientar e morrer no areal atrapado pola baixamar da lagoa. Trátase dunha especie peláxica de esqueleto óseo e que pode alcanzar un tamaño considerable.

O orellán habita en augas mornas e tropicais de todo o mundo, e evita augas cunha temperatura inferior aos 13 ou 14 graos. A Asociación lembra que en Galicia, no verán, afloran augas profundas que provocan que a temperatura do mar sexa máis fría.

Por esta razón, Arco Iris apunta a que o achado deste exemplar parece confirmar "os progresivos e alarmantes signos de cambio climático que se veñen apreciando en Galicia nos últimos anos" e que poderían provocar "cambios radicais" nos bancos de pesca ou en zonas de cría como a "Marisma de Baldaio".

A Asociación lembra que hai uns días foi atopada unha cría de quenlla en augas da ría de Vigo. Uns feitos que, puntualiza, comezan a deixar de ser extraordinarios e a repetirse con frecuencia, o que vinculan a unha "irreversible tendencia de cambio climático".