Mércores, 23 de Agosto de 2017 10:10




Número de contacto (34)678803735
redaccion@galiciapress.es

A petición para ilegalizar a Fundación Franco chega á Cámara Baixa

|

ArmhcongresoO representante da ARMH mostra a petición entregada.


A Asociación para a Recuperación da Memoria Histórica (ARMH) rexistrou este xoves unha petición no Congreso dos Deputados para que se modifique a Lei de Fundacións e se ilegalicen aquelas que vulneren os dereitos humanos, como entenden que fai a Fundación Francisco Franco.


Bonifacio Sánchez, representante da ARMH, foi o encargado de depositar esta mañá no rexistro da Cámara Baixa a dita petición e explicou aos medios de comunicación que esta persegue "resolver un problema histórico" que permite que existan fundacións e organizacións que se dedican a "inxuriar as vítimas da ditadura franquista e, ao mesmo tempo, a enxalzar a figura dun ditador do carácter que foi Francisco Franco".


"O que esperamos é que os partidos políticos adopten unha iniciativa nese sentido e se normalice unha situación que de xeito evidente é anómala desde hai moitos anos", explicou Sánchez, asegurando que desde a súa asociación xa fixeron o que lles correspondía.


PAZO DE MEIRÁS, "A PUNTA DE LANZA"


Así mesmo, respecto da polémica que suscitou a xestión do Pazo de Meirás por parte da Fundación Franco, Sánchez mantén que tan só é "a punta de lanza" dun problema que "vén de moi, moi atrás".


"A Fundación Francisco Franco vén facendo declaracións, por exemplo en relación á Lei de Memoria Histórica ou á reclamación de xustiza por parte das vítimas da ditadura, constantemente negando os crimes da ditadura e negándolle ademais lexitimidade ás vítimas para reclamar os seus dereitos", detallou o membro da ARMH.


DEREITOS HUMANOS


Preguntado sobre se é unha iniciativa exclusivamente destinada á ilegalización da Fundación Franco, ou se é aplicable a outras, Sánchez expresou que, aínda que descoñece o número de fundacións que están "a vulnerar a Declaración Universal dos Dereitos Humanos", a petición rexistrada "resolvería o problema con todas as fundacións" e non vai "dirixida a unha soa".


"Non sabemos se hai unha ou vinte fundacións; o importante é que ese franquismo que está aí, que é real e auténtico, pase a ser considerado como ilegal e a ser perseguido tal e como se formula nos trinta artigos da Declaración de Dereitos Humanos", manifestou Sánchez, quen por outra banda considera que no ordenamento xurídico español falta "concreción".


"Pedimos que concreten determinados comportamentos e patoloxías que han de ser tratados con man firme. Insisto nos dereitos humanos como clave de todo este problema", sentenciou.

relacionada Suma de forzas para recuperar o Pazo de Meirás para o uso público
relacionada A Xunta asegura que "non lle gusta" ver a Fundación Franco en Meirás
relacionada A Fundación Francisco Franco presume de difundir desde Meirás a "grandeza" do ditador

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Pombapress animation 1

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress