A oposición pide un pleno extraordinario sobre o traspaso da AP-9

|

Ap9autopistaAP-9 sentido Vigo.

O portavoz do Grupo Socialista no Parlamento de Galicia, Xoaquín Fernández Leiceaga, manifestou este luns o obxectivo de que Feijóo teña que comparecer sobre o veto ao traspaso da AP-9 no Pazo do Hórreo, unha pretensión que comparte co BNG e que apoia En Marea.


Finalizado o período de sesións na Cámara galega, a unidade dos tres grupos posibilita que se reúna a Deputación Permanente --o órgano director fóra do período ordinario-- e apunta cara ao PPdeG, quen se remitiu á reunión da mesma, cando se produza, para situarse.


En concreto, Puy asegurou que non ten constancia de que a petición se rexistrase formalmente e remitiuse á reunión da Deputación Permanente, se se demanda, onde os populares estarán "encantados" de dar os seus argumentos.


Previamente, noutra rolda de prensa na Cámara, Leiceaga insistiu en que Feijóo debe dar explicacións e esixiulle que rectifique tras "erosionar a posición de Galicia" sobre a AP-9. Os socialistas non entenden a "posición de complicidade pactada" do presidente co Ministerio de Fomento.


REBAIXA NAS PEAXES


Na súa rolda de prensa, afirmou que dos ingresos derivados das peaxes da estrada (138 millóns en 2016), 45 millóns destínanse a tributos e outros 45 millóns "son beneficios para a concesionaria". Criticou tamén a posición do Ministerio de Fomento e apuntou que, "se non se lucrase, xeraríanse as condicións para facer unha rebaixa nas peaxes".


Pola súa banda, a portavoz nacional do BNG, Ana Pontón, cuxo Grupo tamén demanda a comparecencia de Feijóo na Cámara, censurou que o mandatario galego diga que non é viable "por un problema de 7 millóns de euros", en alusión ao custo anual das peaxes bonificadas de Rande e A Barcala.


O BNG tamén formula unha batería de propostas sobre a xestión de Audasa, entre elas a de levantar as barreiras cando as colas superen o quilómetro de retención, sancionar a concesionaria polas retencións que xa se produciron e abaratar as peaxes nos tramos en obras. "Feijóo non pode escurrir o vulto e marchar de vacacións", indicou.


Á súa vez, a través dun comunicado, o Grupo Parlamentario de En Marea mostrou o seu apoio á petición anunciada por PSOE e BNG.


"DISCREPANCIAS" NO PP


Preguntado na rolda de prensa que ofreceu tamén este luns, Puy apuntou que este traspaso está a crear "discrepancias" entre membros do mesmo partido polo que "é evidente" que a Xunta "si que está a impulsar" esta iniciativa.


Por iso, incidiu en que o problema "está no Estado", xa que é o que "está a vetar" esta medida, e lamentou que a Pontón "lle preocupe máis" culpar a quen "non ten a culpa".

relacionada Rajoy anuncia obras millonarias en estradas mentres bloquea o traspaso da AP-9
relacionada Feijóo escuda en "problemas terriroriais" a negativa de Madrid ao traspaso da AP-9

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress