Novo intento de desbloquear o conflito do metal da Coruña

|

Metal


Os sindicatos e a patronal volverán sentar este luns coa Inspección de Traballo da Coruña nun acto de mediación para tentar desbloquear o conflito do sector do metal polo novo convenio colectivo.


O acto está previsto para as 17,00 horas e as centrais acudirán, segundo destaca CC.OO., avanzando que se mantén a convocatoria de folga prevista para este martes, 4 de xullo.


O secretario de Comisións Industria, Víctor Ledo, asistirá como parte do equipo asesor da comisión negociadora. Respecto diso, lembra, a través dunha nota de prensa, que a plataforma reivindicativa xunto a UXT e CIG recolle 14 puntos "obxecto de bloqueo" por parte dos empresarios.


Nalgunhas cuestións, segundo indica, "houbo tímidos avances" a semana pasada e a patronal "insinuou que podería aceptar, aínda que con matices, parte das peticións".


Con todo, asuntos como a cláusula de garantía salarial por encima do IPC, a subrogación do persoal das subcontratas e a habilitación de mecanismos contra "os abusos das mutuas" continúan sendo "elementos clave" para esta xornada.


Ledo tampouco esquece a problemática das auxiliares de grandes empresas como Navantia e Repsol, para as que "é necesaria unha solución no marco deste conflito".


CONTEXTO


Esta negociación responde á necesidade de actualización do convenio, que leva sen renovarse desde 2014. Vén precedida de dúas xornadas de paros masivos, segundo os sindicatos, nos principais polígonos da provincia da Coruña.


Así, o pasado xoves 22 de xuño, case 4.000 traballadores saíron á rúa, no primeiro día de folga, con manifestacións en Ferrol, A Coruña e Santiago, que se repetiron este martes 27.


CIG, CC.OO e UXT, que claman por un convenio "digno e con dereitos", valoraron a primeira xornada como "histórica", ao asegurar que facía 25 anos que non se convocaba unha folga xeral nos centros de traballo con este convenio.

relacionada Sindicatos do metal ven "lonxe" o acordo coa patronal e manteñen a folga
relacionada Vontade de diálogo na reunión entre sindicatos do metal e patronal na Coruña
relacionada Xornada "histórica" de folga no sector do metal coruñés por un convenio "digno"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress