Os galegos cobramos uns 490 euros menos ao mes que os traballadores europeos

|

Sueldosalariocalculadora


O salario medio ordinario bruto nos 28 países da Unión Europea é, en media, de 1.934 euros mensuais, mentres que a remuneración media galega resulta un 25,2 por cento máis baixa, ao situarse en 1.447 euros ao mes.


Así o recolle o V Monitor Anual Adecco sobre salarios, que sinala que, en termos absolutos, a diferenza de Galicia coa media da UE é de 487 euros mensuais, o que supón 5.844 euros por ano.


O salario medio de España, pola súa banda, é un 15,4 por cento menor que o europeo (1.636 euros ao mes). Un ano atrás, segundo se sinala no estudo de Adecco, a remuneración media europea era de 1.944 euros por mes (-0,5% interanual).


"Esta caída, lixeiramente máis profunda que a experimentada pola remuneración galega (-0,1%), fixo que se acurte a distancia entre ambas as magnitudes pois un ano atrás o salario galego presentaba unha desvantaxe fronte ao europeo dun 25,5% (496 euros mensuais)", segundo explica Adecco.


A pesar da desvantaxe en comparación coa remuneración media europea, Galicia sitúase nunha situación intermedia, xa que "hai 15 países europeos cuxos salarios medios son inferiores ao da rexión, mentres que os restantes 12 países teñen remuneracións maiores que a galega", segundo engade Adecco.


Segundo o nivel do seu salario medio mensual, un primeiro grupo de doce países contan cunha remuneración media inferior a 1.000 euros por mes. Excepto Grecia (996 euros/mes) e Portugal (968 euros/mes), todos eles son de Europa do Leste, entre os que se inclúen Bulgaria (380 euros), Romanía (499 euros), Hungría (564 euros), Lituania (595 euros), Letonia (608 euros), Polonia (670 euros), República Checa (770 euros), Eslovaquia (780 euros), Croacia (784 euros) e Estonia (839 euros).


MÁIS DE MIL EUROS


Mentres, segundo o estudo, hai outros nove países cunha remuneración media de máis de 1.000 euros, pero de menos de 2.500 euros, que conforman o grupo con salarios intermedios. Entre eles colócanse España e Galicia, con 1.636 e 1.447 euros, respectivamente.


Ademais intégranse neste grupo Eslovenia (1.136 euros), Malta (1.170 euros), Chipre (1.256 euros), Italia (1.977 euros), Francia (2.249 euros), Reino Unido (2.395 euros), Austria (2.403 euros) e Bélxica (2.490 euros).


Por último, outro grupo de sete países gozan de remuneracións medias de máis de 2.500 euros por mes. Son os casos de Alemaña (2.576 euros), Suecia (2.583 euros), Finlandia (2.602 euros), Holanda (2.628 euros), Irlanda (2.668 euros), Luxemburgo (2.986 euros) e Dinamarca (3.637 euros).

relacionada Os galegos necesitamos o soldo completo de 7,4 anos para comprar unha vivenda
relacionada A hora traballada en España é 8,5 euros máis barata que na zona euro
relacionada O salario galego colócase no podio dos máis baixos de España no último lustro

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Condicións de uso Consello editorial
Powered by Bigpress