Francina Armengol retira o seu apoio a Patxi López en favor de Pedro Sánchez

A presidenta do Goberno Balear, Francina Armengol, pediu ao ex lehendakari Patxi López que retire a súa candidatura á Secretaría Xeral do PSOE e sómese á de Pedro Sánchez. Armengol, que foi un dos primeiros apoios de López, deixou claro que ela apoiará a Sánchez nas primarias do día 21.

Nunha entrevista na Cadea Ser este luns pola noite, recollida por Europa Press, Armengol relatou que ela "sempre" pensou que Pedro Sánchez se integraría na candidatura de Patxi López, que foi o primeiro en presentarse, porque cre que representan o mesmo modelo de partido, pero agora ve evidente que Sánchez "tivo moito éxito".

Así, precisou que, despois da presentación dos avais, na que quedou claro que hai "dúas persoas con dous modelos con opcións", ela falou con López para pedirlle que retirase a súa candidatura. É máis, engadiu que "moitos militantes e dirixentes que apoiaron a Patxi (López) que agora "lle fixeron a mesma reflexión".

Segundo dixo, comprende que o exlehendakari non se retire, pero ela apoiará a Sánchez, porque é quen pode gañar (Pedro Sánchez presentou 53.117 firmas, Susana Díaz 59.390 e Patxi López, 10.866). Ao seu modo de ver, en todo caso López "é útil no partido e seguirá séndoo".