A bancada de Balaídos danada polo temporal xa está reparada e reforzada
Retiráronse as pranchas soltas que podían caer e asegurouse a cuberta, tamén en zonas próximas á afectada.
A bancada de Río no Estadio Municipal de Balaídos, que quedou danada o pasado 3 de febreiro debido ao temporal, quedou reparada tras unha semana de traballos de reforzamento e de retirada dos elementos en risco de caer, segundo confirmou este luns o alcalde, Abel Caballero, en rolda de prensa.
O rexedor olívico explicou que as obras de aseguramento da cuberta xa están finalizadas, que se fixaron as pranchas soltas, reforzáronse as existentes para aumentar a súa resistencia "nun 35 por cento" e retiráronse as partes que non se podían reparar.
Ademais da reparación da zona danada, actuouse nas zonas próximas, de modo que se rehabilitou ou reforzou unha superficie de 350 metros cadrados.
Por outra banda, con respecto ás críticas sindicais polo feito de que fosen os bombeiros os que executasen, en horas extras, esas obras de reparación, Abel Caballero aclarou que "é o seu traballo". "Ese traballo fíxose desde o público, con toda a seguridade e a profesionalidade. É o seu traballo e fixérono extraordinariamente ben. A cidade estalles moi agradecida", sentenciou.
Escribe o teu comentario