​(TRAILER) O cineasta Jacobo Lagüela filma á súa avoa durante 8 anos para o documental ‘Julia’

O realizador galego presenta a súa última obra, ‘Julia’, na que realiza unha radiografía da situación do rural en Galicia.

A preestrea do documental celebrarase o vindeiro sábado 26 de febreiro ás 17 horas no Auditorio Carmen Estévez de Vilalba.

Jacobo Lagüela é un director e produtor galego que, aínda que reside en Bristol, ten moi presente o drama do rural galego, ese en o que creceu e no que vive a súa avoa, Julia, que protagoniza a súa última obra. Ao longo de 8 anos, o realizador seguiu intermitentemente a vida da súa avoa, con Vilalba e o rural como escenario e practicamente como protagonistas do documental.

A obra podería enmarcarse dentro da corrente do ‘Novo cinema galego’, unha liña na que o peso das protagonistas femininas e a paisaxe cobra unha importancia capital.

“A inspiración para realizar este filme chegou cando emigrei. Durante a miña infancia, sempre escoitei que se quería chegar a algo debía irme a algún outro lugar, onde houbese máis traballo, lonxe do rural, que xa non podía ofrecerme nada. E fíxome falta marcharme para valorar de verdade o que deixaba en casa”, conta o seu director.

Jacobo Lagüela | Foto: CityBlue Films

“SALVAR As RAÍCES”

O documental, de pouco máis dunha hora de duración, relata o día a día de Julia no rural galego. A través dos ollos desta muller, que hoxe ten 89 anos, Lagüela denuncia “a extinción e abandono do rural” mentres o seu protagonista loita por “salvar as súas raíces”.

“Julia representa a unha xeración de mulleres de posguerra no rural galego. Ao longo do filme non só nos embarcamos na viaxe a través da súa vida persoal, tamén viaxamos entre pasado, presente e futuro. Este xogo temporal pon de manifesto a extinción do rural en Galicia, mostrando unha España que se vai baleirando co paso dos anos. Servíndose de arquivo histórico, o espectador viaxa á Galicia dos anos 30, 40, 50, 90 ata a dos 2000; ao ritmo lento e sosegado que caracteriza esta atmosfera bucólica”.

“Julia é memoria histórica e unha chamada de atención; se esquecemos de onde vimos, nunca saberemos onde imos”, reza a sinopse da peza documental que será preestrenada o vindeiro sábado 26 de febreiro ás 17 horas no Auditorio Carmen Estévez de Vilalba.