Enésimo brote de coronavirus nunha granxa galega de visóns, esta vez en Carral​

Desde o estalido da crise sanitaria, máis da metade das explotacións deste tipo en Galicia reportaron brotes.

Só na granxa de Carral afectada hai máis de 12.000 exemplares de vison, pese que só se detectaron oito positivos de momento.

Vison | Foto: EP

Os brotes de covid en granxas de visóns en Galicia seguen á alza. O último do que informou a Consellería do Medio Rural este venres afecta a unha explotación de Carral (A Coruña).

Son oito os positivos detectados nesta granxa, que conta con 12.704 visóns --dos cales 1.592 son reprodutoras femias, 98 son reprodutores machos e 11.014 son crías destetadas--.

Con base no programa de prevención do Goberno central, procedeuse a inmobilizar a explotación e farase o seu seguimento para determinar as actuacións para realizar.

Así, son xa 14 os brotes comunicados pola Xunta ao Ministerio de Agricultura desde o inicio da pandemia, nunha comunidade galega que conta con 25 explotacións. De feito, só no mes de outubro xa se detectaron outros dous focos en senllas explotacións de Abegondo.

Galicia concentra o maior volume de negocio do sector no Estado e tres de cada catro explotacións de visón americano do total, cun censo de 71.479 reprodutoras.

O primeiro foco en Galicia detectouse en xaneiro deste ano nunha granxa da Baña, onde foron sacrificados os seus 3.100 visóns. O resto localizáronse en: Santiago (2), Abegondo (5), outro máis na Baña, Oza-Cesuras, Negreira, Sobrado dos Monxes, Curtis e agora este de Carral.