Seguen as negociacións para formar goberno en Catalunya, sen que polo menos publicamente, avanzasen demasiado polas condicións e vetos que se van poñendo os partidos entre si. Mentres, a formación que máis votos conseguiu o 14F segue coa súa estratexia de presentar a candidatura de Salvador Illa para para ser votada no Parlament, aínda que é coñecedor de que os números non suman se non fan un pacto cos republicanos, cousa que non vai se é posible pola inquina dalgúns dirixentes de ERC co socialismo catalán, e porque Aragonés quere ser o presidente da Generalitat de Catalunya.
Transcorreron 14 días desde as eleccións e aínda non parece claro cales van ser os partidos que van formar parte do goberno ou van apoialo desde fóra. ERC e JxCat son os que teñen máis números, a pesar das desavinzas públicas que tiveron ao longo do seu goberno, agora en funcións. Pero necesitan outro partido e ademais escenificar a unidade dos partidos independentistas, cousa nada fácil. Iso quere dicir que a CUP debe estar metido na “pomada”. Unha vez máis os antisistema poñen condicións e vetos para dar apoio, e mesmo non descartan entrar a formar parte do novo Govern. E sen deixar de lado a súa aspiración de presidir o Parlament, cousa bastante improbable. Os republicanos queren ampliar o abanico e piden aos Comúns de Colau que entren a formar parte do goberno, Estes xa responderon que co partido de Puigdemont non gobernan e non queren saber nada.
Ante esta situación, a Jesica Albiach – e ao Consell do seu partido tamén- se lle ocorreu que unha boa fórmula sería que ERC e o seu partido os Comúns formen goberno co apoio desde fóra dos socialistas aos que pide xenerosidade porque esta é a única opción realista. Salvador Illa, por outra banda, gañador das eleccións, contestoulle coa mesma fórmula pero ao revés, é dicir, que os republicanos lles dean apoio nun goberno de socialista e os Comúns. Esquécese Albiach da xenerosidade que están a ter eles co goberno de Pedro Sánchez ao que día si e outro tamén, Pablo Iglesias machuca con tal de conseguir un titular, sen importarlle a gobernabilidade e a imaxe deste país.
É curioso que os partidos que están no quinto e sexto lugar en votos, a CUP e Comúns, teñan a clave dun goberno porque as rifas persoais impidan un goberno de PSC e ERC, partidos que foron o primeiro e o segundo en votos e igualados en escanos. Iso está a prexudicar a Catalunya ante a imposibilidade de ter xa un pacto que facilite a gobernabilidade coa que está a caer. Unha situación de irresponsabilidade máxima.
Faise necesario, máis que nunca, que leve a cabo a modificación da Lei Electoral para que os votos de todas as persoas vallan igual: unha persoa un voto. Sería a maneira de terminar con situacións como a que se están vivindo.
Escribe o teu comentario