Caeiro Ribeira despediu a un traballador por presentarse pola CIG e agora debe readmitilo
A central nacionalista acusa o grupo de concesionarios de malas artes reiteradas para prexudicalos a eles e favorecer a UXT
Concesionario de Renault Caeiro en Ribeira nunha imaxe de Google Street View
Á RÚA O DÍA ANTES DAS ELECCIÓNS
Segundo figura no fallo, con data do 29 de xullo de 2020, a empresa terá tamén que abonarlle os salarios de tramitación e recoñecerlle a súa condición de delegado sindical. Contra esta sentenza cabe presentar recurso de suplicación ante o Tribunal Superior de Xustiza de Galicia (TSXG).Este traballador foi despedido o 19 de decembro de 2019 por unha "falta laboral", xusto un día despois de presentarse pola CIG ás eleccións sindicais a celebrar en xaneiro de 2020.
A CAUSA DO DESPEDIMENTO NON EXISTE
O xuíz declara probado que a empresa "indagou" a través dunha comunicación con outro empregado sobre o ocorrido na asemblea do 18 de decembro para a presentación de candidaturas. Ademais, conclúe que queda acreditado que "non existe causa que xustifique o despedimento do traballador".Por tal motivo, a Sala falla que "o despedimento constitúe unha represalia da empresa ao traballador por ser candidato no proceso electoral e, posteriormente, saír electo como representante legal dos traballadores".
"Non é a primeira vez que a empresa recorre a presións ou represalias para impedir que saian elixidos os representantes da CIG, a favor de UXT"
SAÍU ELIXIDO NAS ELECCIÓNS
O persoal elixiu a este traballador como o seu representante nas eleccións sindicais do 21 de xaneiro. Este resultado foi impugnado pola empresa, pero un laudo arbitral confirmou o 30 de xaneiro a validez do proceso.Pola súa banda, nun comunicado, a CIG denuncia que esta "non é a primeira vez que a empresa recorre a presións ou represalias para impedir que saian elixidos os representantes da CIG, a favor de UXT".
Escribe o teu comentario