Calendario escolar 2020-2021: Os alumnos volverán a clase a partir do 10 de setembro, do 16 en secundaria

Aínda é só unha proposta, pero a Xunta pretende que os estudantes retornen ás aulas nas datas habituais tras as vacacións de verán

A Consellería de Educación, Universidade e Formación Profesional convocou a mesa sectorial para este martes, onde analizará cos sindicatos o calendario para o curso que vén.

Á espera de hipotéticas modificacións, a proposta da Xunta é similar a outros anos: arrincar o curso o 10 de setembro, co alumnado de infantil, primaria e educación especial (o 16 para ESO, bacharelato e FP), e pechalo o 22 de xuño de 2021.

Os períodos de vacacións serían o de 'Nadal', entre o 23 de decembro e o 7 de xaneiro; 'Entroido', entre o 15 e o 17 de febreiro; e Semana Santa, entre o 27 de marzo e o 5 de abril.

OUTROS FESTIVOS

Tampouco serían días lectivos as festas de ámbito estatal, os festivos da comunidade autónoma e o 7 de decembro, 'Día do Ensino'.

O borrador enviado aos sindicatos inclúe o calendario para os comedores escolares, que coincide coas datas de inicio do curso propostas.