Ducias de vixiantes de seguridade protestan contra Afundación (Abanca) por despedimentos en Ourense

Os asalariados acusan á fundación do banco de forzar á nova contratista a prescindir dos compañeiros de Finca Sevilla para aforrarse a súa antigüidade

Unhas 70 persoas concentráronse este luns ás portas do edificio Sevilla de Ourense para denunciar a "complicidade" de Afundación no despedimento de tres vixiantes de seguridade.

Vixiantes de seguridade protestan diante de Finca Sevilla contra Afundación nunha foto de USO Galicia

Convocadas pola federación de traballadores de seguridade privada do sindicato USO, o seu secretario xeral, Gerardo Román, destacou que pediron "comprensión" por estas "tres familias" que desde o pasado 31 de xullo xa non traballan para a empresa Prosegur.

NOVA CONTRATA

Segundo critica, a causa do despedimento foi o traslado da sede de Afundación e que, co cambio de compañía (de Prosegur a Eulen), os traballadores "non foron subrogados".

"Ou unha empresa ou a outra se teñen que facer cargo", advertiu, antes de sinalar que o vindeiro mércores está previsto un acto de conciliación, pero que "Eulen di que non lle corresponde" a subrogación.

E é que, de feito, a federación de traballadores de seguridade privada da central acusa a Afundación de "forzar coa empresa adxudicataria da seguridade do edificio Sevilla a non subrogación dun persoal de vixiantes para aforrarse o sobrecusto das súas antigüidades".