Ampliar o servizo de hemodinámica de Lugo a 24 horas permitiría atender a 180 pacientes máis ao ano

O xefe de cardiología do Hospital Universitario Lucus Augusti (HULA), Juan Carlos González Juanatey, avoga por que o servizo de hemodinámica se amplíe ás 24 horas do día, xa que agora tan só atende a infartados entre as 08.00h e as 22.00h. 

Desde Alemaña, onde participa nun congreso médico, lembrou que foi a comisión de seguimento do Rexistro Galego de Infartos (Regaliam) a que propuxo que aumentase ata as 22.00h un servizo que antes só funcionaba ata as 15.00h, en "horario de oficina".

Este aumento de horario ata as 22.00h respecto ao anterior permite atender no HULA a "ao redor de 180 casos" máis ao ano. "O nivel de traballo que nós temos coa extensión ata as dez da noite demostrounos que o número de casos permite manter un nivel de actividade na sala", explica.

Por iso, calcula que na unidade de hemodinámica do hospital de Lugo aténdense ao redor de "dous terzos" dos pacientes por cardiopatías que se producen na provincia. Así, agora quedan sen cubrir en Lugo un terzo de afectados, "que veñen pola noite, desde as dez da noite a oito da mañá", unhas 180 persoas -son preto de 550 pacientes ao ano en toda a provincia, segundo esa estimación-.

De tal forma, confía en que "proximamente" Regaliam poida "ver" os datos para que se poida "pronunciar" ata completar as 24 horas do servizo en Lugo. Esta esixencia tamén a levou a cabo a oposición o pasado mes de decembro.