Francia levanta a Copa do Mundo tras derrotar a Croacia (4-2)

Francia conquista a súa segunda estrela 20 anos despois da primeira nunha final portentosa con Griezmann e Mbappé como grandes artífices. Os goles de Perisic e Mandzukic non foron suficientes nunha Croacia que non desfaleceu ata o final.

Redacción
| Domingo, 15 de Xullo de 2018, 19:04

Os franceses celebran un gol (Getty Images)

Francia convértese en novo campión mundial tras vencer (4-2) a Croacia na final disputada no estadio Luzhnikí de Moscova. Os goles de Mandzukic en propia porta, Griezmann, Pogba e Mbappé dan a segunda estrela mundialista á selección gala. Perisic e Mandzukic recortaron pero foi insuficiente para Croacia, que consegue o seu mellor resultado histórico nun Mundial de fútbol.

Acabouse. Francia deixou atrás dúas décadas de lamentacións e escribiu na súa dilatada historia un novo capítulo de gloria. Atrás quedaron eliminacións na primeira ronda, escándalos extradeportivos ou derrotas en finais. Na mente do francés perduraba con tristeza a imaxe de Zidane derrubando a Materazzi á vez que Trezeguet fallaba o penalti decisivo, ou ao xogador con menos pedigrí de Portugal esnaquizando ilusións na prórroga, na súa propia casa.

Os galos conseguiron repoñerse e chegar a Rusia como candidato, pero tamén un chanzo por baixo de Brasil, Alemaña ou España. Mellor. Se houbo presión, nin se notou. Francia, que superou a fase de grupos sen adornos, desatou todo o seu potencial nas eliminatorias. Arxentina, Uruguai e Bélxica capitularon practicamente sen oposición. Croacia pelexou e loitou coma se non xogase tres prórrogas consecutivas. Pero foille imposible ante cada mazazo.

A primeira parte levoulla Francia cun gol en propia e outro de penalti (primeira vez que intervén o VAR nunha final), os dous discutidos. Os arlequinados mereceron máis que o golazo de Perisic, con perigo constante tanto por terra como por aire. Pero tras o descanso, Mbappé espertou cunha arrancada e disparo que sacou Subasic, outra que acabou no gol de Pogba e un tiro desde a frontal para colocar o 4-1. O tanto de Mandzukic, practicamente un espellismo no único erro de Lloris en todo o torneo.

Francia suma a súa segunda estrela, superando a España e Inglaterra, logrando un título que se resistía en 20 anos e que fai xustiza ao país que modelou o fútbol, pero sobre todo a un Deschamps que foi fiel á súa proposta e ao espírito do 98. No país da tortilla de queixo e os croissants, a vida volve ser de cor azul.