As mareas conseguen a súa primeira gran remunicipalización coa ORA de Santiago

Votación moi significativa política e economicamente no pleno de Santiago. Compostela Aberta e BNG sumaron forzas para aprobar definitivamente a remunicipalización da ORA e o guindastre. É a primeira gran remunicipalización que logra unha marea urbana, xa na recta final da lexislatura. Compostela Aberta conségueo a pesar dos reparos postos pola intervención municipal.

O pleno do Concello de Santiago aprobou de forma definitiva a remunicipalización do servizo da ORGA e o guindastre, que pasará a ser asumido pola empresa municipal de transportes Tussa, tras máis de dous anos desde a anulación por sentenza xudicial do concurso público concedido en 2012 á empresa Setex Aparki, que desde entón prestaba o servizo a través de prórrogas.

O voto de calidade do rexedor compostelán, Martiño Noriega, permitiu decantar a balanza e desfacer o empate a doce rexistrado na votación para dar luz verde a que a administración pública asuma os servizos. PP e PSOE --que desde hai dous anos conta con só tres dos catro edís que lle corresponden-- votaron en contra, mentres o grupo de goberno (Compostela Aberta) e BNG fixérono a favor.

O BNG explicou que a súa postura de facilitar a decisión proposta por CA foi por "ideoloxía" e por "compromiso coas familias dos traballadores". E é que o seu portavoz, Rubén Cela, mostrouse moi crítico coa maneira de xestionar o proceso por parte do grupo de goberno, ao que lle choveron críticas tamén por parte de socialistas e populares.

De feito, PSOE e PP acusaron a Compostela Aberta de expor unha cuestión "sen seguridade xurídica" e "extorsionar" aos grupos da oposición ante a ameaza da suspensión do servizo en caso de non aprobarse, o que afectaría os traballadores.

En contra da remunicipalización tamén está o Interventor muncipal, que emitiu un informe advertindo da súa posible ilegalidade. Reparo que hoxe conseguiron levantar a alianza entre Compostela Aberta e Bloque. 

Un feito moi importante politicamente, pois as remunicipalizaciones foron unha promesa estrela das mareas na campaña electoral e agora, a un ano vista das novas eleccións, un dos seus alcaldes, Martiño Noriega, pode presentarse ante os seus electores con algo concreto e significativo cumprido.