Carta aberta dos radiólogos de Vigo a Rueda: "A resposta debe ser homoxénea, pero acorde á necesidade"

Novo día de protestas ante o Hospital Álvaro Cunqueiro de Vigo, e con este van xa nove seguidos tras a folga iniciada o pasado luns 6 de outubro polo servizo de radioloxía da área sanitaria viguesa, que leva anos demandando un reforzo durante as gardas, que a día de hoxe cobren dous profesionais en lugar do tres que demanda o colectivo de radiólogos. A última oferta da Xerencia propuña reforzar a quenda de urxencias cun profesional máis os luns e de martes a venres durante a quenda de tarde, unha suxestión que foi descartada polo comité de folga ao non axustar ás súas demandas.

O EXEMPLO DE VIGO E FERROL

O luns, tras a celebración do Consello da Xunta, Galiciapres preguntou ao presidente da Xunta, Alfonso Rueda, polas dificultades para atopar unha solución ao conflito e se programaran xa un novo encontro entre o comité de folga e as autoridades sanitarias. Aínda que o mandatario obviou este último punto, si se mostrou aberto a chegar a un acordo e confiou en que este chegue canto antes. 

"Seguiremos traballando para tentar chegar a unha solución. Por unha banda dise que non se está pedindo nada; por outro que non convencen as propostas da Xunta. Loxicamente a Xunta ten que seguir un criterio homoxéneo en todas as áreas sanitarias, adaptar ás circunstancias, pero as propostas deben ser homoxéneas en todas partes", declarou Rueda, que rebaixou o problema dos radiólogos de Vigo a "un conflito localizado especificamente nun hospital concreto". 

A resposta dos radiólogos chega en forma de comunicado, achegado a este diario, onde o persoal di estar "totalmente de acordo con que debe de haber un criterio homoxéneo entre as areas sanitarias e que en todas elas as necesidades dos pacientes deben estar cubertas por igual". 

"Como as áreas sanitarias son diferentes en canto a poblacion e prestacións ofertadas polo Sergas, a dotación de persoal ten que ser acorde ás necesidades de cada unha delas", insisten desde o comité de folga, que reiteran o feito de que a área sanitaria de Vigo conta con dúas radiólogos durante as gardas como Ferrol, a pesar de que "a poboación do area sanitaria de Vigo triplica a outras áreas como Ferrol" e que a olívica é "centro de referencia do sur de Galicia de diferentes especialidades (hemodinamica, cirugia cardíaca, unidade de ictus…)". 

"O hospital terá que ter un número suficiente de radiólogos nas Urxencias para que todos os pacientes, independentemente do hospital, sexan tratados coa mesma celeridade e seguridade", inciden desde o servizo de radioloxía, á vez que referendan que tanto a Xerencia como a Xunta "son os que teñen a potestade de homoxeneizar os profesionais segundo a poboación á que se atende".