Case mil procesos xudiciais paralizados en Galicia pola folga de avogados e procuradores da quenda de oficio

A folga indefinida dos avogados e procuradores da quenda de oficio, que leva xa seis meses e medio vixente, centrou hoxe a Comisión Primeira, Institucional, de Administración Xeral, Xustiza e Interior do Parlamento de Galicia, onde se cifrou en 928 as actuacións, vistas, comparecencias e aduencias previas afectadas en toda a comunidade desde que arrincaron os paros dun sector que demanda melloras laborais e salariais, así como unha solución para os mutualistas, para os que piden unha pasarela ao RETA. 

Foi o director xeral de Xustiza, José Tronchoni, o que deslizou a cifra de casos afectados nos 276 órganos xudiciais de Galicia: o 76% das suspensións producíronse na xurisdición penal, o 24% na civil, un 4% na social e un 1% na do contencioso administrativo. Por provincias, o 39% das actuacións xudiciais suspendidas corresponden á provincia da Coruña; o 35% á de Ourense; 16% á de Pontevedra e un 10% á de Lugo. 

Así, ao día suspéndense uns nove actos de media. A solución, en calquera caso, non parece nin moito menos inmediata, mentres desde o sector programan mobilizacións para este 10 de maio na Coruña e Ourense. 

"RESPECTAR" PERO "NON COMPARTIR" A FOLGA

Tronchoni deu resposta á pregunta achegada polo parlamentario do #BNG, Iago Tabarés, que solicita á Xunta que sente a negociar cos folguistas dunha vez por todas, tendo en conta que é o Goberno de Galicia o que ten as competencias en materia de Xustiza e un dos actores con moito que dicir neste conflito. 

Na súa intervención, Tronchoni dixo que, aínda que respectaba a folga, a súa posición é a de "non compartir" a decisión dos paros. De feito, este punto, o da folga, foi obxecto de debate no gremio. O propio decano do ICA de Lugo manifestou recentemente neste diario os seus receos ao redor da idoneidade desta folga indefinida xa que, ao seu xuízo, o que correspondería neste caso sería un "peche patronal". 

No mesmo orde, o director xeral di manter reunións co sector durante 2023 e 2024, onde se abordaron asuntos como o incremento das partidas para a quenda de oficio ou a inclusión de conceptos novos. Por iso, suxire que se chegaron a acordos beneficiosos para estes profesionais que hoxe seguen en folga, como a actualización e inclusión de novos conceptos no baremo de indemnizacións ou a redución da tramitación no pago da representación e defensa das persoas insolventes que non teñen recoñecido o servizo de dereito de xustiza gratuíta.

A maiores incluirase no baremo de indemnizacións conceptos como a intervención letrada en entradas e rexistros domiciliarios, o proceso concursal e procesos de especial complexidade en todas as ordes. Tamén se prevé unha revisión de todas as cantidades do baremo.

PEOR QUE EN 2018?

A continuación, e como xa fixese Alfonso Rueda a consulta deste diario, Tronchoni sacou peito porque a galega, que investiu desde 2010 167 millóns á asitencia xurídica gratuíta -só o ano pasado, deslizou, precisou dun investimento por encima dos 876.000 euros-, sexa unha das comunidades cos baremos máis elevados, ademais de ser das que realizan os pagos con maior prontitude. Ademais, a galega é unha das poucas rexións que incorporou a defensa e representación de persoas xurídicas nos procesos penais, así como o acompañamento inicial ás vítimas de especial vulnerabilidade.

A pesar de todos os números que aireou Tronchoni, desde a bancada nacionalista censuraron a actitude dos populares fronte aos avogados e procuradores da quenda de oficio. "A xestión desta situación xa é peor que a de 2018, cando a folga de funcionarios durou catro meses", reprendeu Tabarés, que pon o foco nas consecuencias a longo prazo que xa se comezan a advertir nos xulgados, que sofren un embotellamento polo gran número de casos suspendidos e que teñen que ser sinalados no futuro. 

Por todo isto, demandan á Xunta máis orzamento para o sector, recalcando que Galicia é unha das comunidades onde o investimento por habitante neste ámbito é menor.