Folga no SERGAS? Ou'Mega segue coas asembleas, a primeira en Santiago, mentres dialoga coa Xunta

A convocatoria da Consellería de Sanidade para manter un encontro co sindicato Ou'Mega ten lugar o martes, xusto despois do luns no que se abriu o proceso asembleario para coñecer a disposición dos sanitarios a celebrar mobilizacións ou, mesmo, unha folga.

O secretario xeral do sindicato, Manuel Rodríguez Piñeiro, comenta para Galiciapress os resultados desta primeira asemblea celebrada en Santiago, onde se debuxou o bosquexo do que será a votación para determinar si acoden ou non á folga.

A continuación, Rodríguez explica que non espera un achegamento definitivo mañá con Sanidade e desglosa que, máis aló do complemento específico, os sanitarios teñen outros problemas que poden levalos á folga. 

Este luns a Consellería de Sanidade descolgou o teléfono para citar aos representantes do sindicato Ou'Mega para establecer unha conversación e evitar unha eventual folga dos profesionais sanitarios, unha cuestión á que o sindicato está sometido estes días a consulta entre o persoal dos hospitais. A chamada de Sanidade chegou xusto o día no que Ou'Mega celebraba a primeira destas asembleas previstas nos distintos hospitais galegos e que hoxe tivo o seu arranque en Santiago de Compostela, coa previsión de celebrar o segundo encontro mañá en Pontevedra. 

Manuel Rodríguez Piñeiro, secretario xeral do sindicato, explica que a reunión de hoxe en Santiago tivo un resultado "realmente satisfactorio nalgúns aspectos" e que "marca un pouco a traxectoria das próximas reunións", que non quedan suspendidas pese ao achegamento da administración pública. 

Nesta primeira data, o sindicalista percibiu que os profesionais sanitarios están "moi sensibilizados con respecto ás mobilizacións que se expoñen", pero que a decisión levará tempo e será o resultado dun proceso exhaustivo e sobre o que o sindicato aínda está a traballar. 

"A votación dun só hospital para determinar un tema tan importante como unha folga non é o ideal", valora Rodríguez, que se resiste a dar máis datos do ocorrido no hospital compostelán para non condicionar aos profesionais sanitarios doutras áreas. 

PROCESO DE VOTACIÓN: ENQUISA, RESULTADO "MAIORITARIO"...

Con todo, este luns si se acordo, entre outras medidas, crear unha "base de datos" na que se identificará a "todos aqueles compañeiros dispostos a facer a votación sobre que tipo de mobilizacións imos realizar".

Do resultado dese censo sairá unha enquisa, que será sometida ao escrutinio das persoas que figuren na base de datos, cunha votación que "non será anónima, senón nominal, para evitar que se poida votar dúas veces". A enquisa non se contempla até despois do próximo luns, cando conclúa o carrusel de asembleas. 

Ao tempo, Rodríguez subliña que a decisión "non será inmediata", que abrigará a todos os hospitais e que non responderá á maioría simple. "Teñen que ser unha representación significativa. Non falamos de porcentaxes, pero o 51% non é unha representación, ten que ser do 65% cara arriba. Falamos de que si hai mobilizacións teñen que estar secundadas por unha gran maioría. Se non é así, é unha maneira de perder o tempo. Imos ser serios e será a decisión do groso do sector", condiciona o secretario xeral. 

BASES DUN DIÁLOGO

Da convocatoria de mañá, Rodríguez non garda grandes esperanzas, senón que espera que sexa unha forma de sentar as bases de face a futuras conversacións entre Sanidade e o sindicato. "A reunión de mañá pódenos dar máis luz. En base ao que nos diga a reunión poderían non facer falta máis reunións...pero non cremos que vaia ser así", admite Rodríguez. 

Nesa liña, Rodríguez espera que se abra "unha vía de negociación en base a unha primeira proposta". "Esa é a nosa esperanza, pero de aí ao que realmente queira Sanidade... Hai que esperar, ver que proposta fai e si é seria e realista, o que podería parar este proceso, ou si é como até agora, atrincheirada no non: en que non é factible, en que é economicamente inviable, etc", reprende. 

ACORDO POLO COMPLEMENTO ESPECÍFICO?

"Nós xa estamos no camiño, co tren nos raíles", advirte Rodríguez, que ve motivos máis que dabondo para ir á folga se fixese falta, máis aló da polémica en torno ao cobro do complemento específico, un dos alicerces sobre o que se sostén o enfado dos sanitarios. 

"A folga de principio sería polo complemento", recoñece Rodríguez, antes de apostilar que non é o motivo único porque "a nosa sanidade pública está feita uns raposos". 

"A Atención Primaria e os PACS teñen unha problemática moi agravada, na prensa salgue todos os días a situación das Urxencias con colapsos, listas de espera, problemas en especialidades con déficit de persoal, hospitais cun numero de facultativos por baixo dos cocientes establecidos… Xustificacións para facer unha folga masiva existen, e moitas", gabia.