Fuga de médicos de Ourense porque as condicións son peores, alertan galenos e sindicatos
O SERGAS debería convocar como de difícil cobertura as prazas requiridas para as especialidades deficitarias en Ourense para evitar que os galenos emigren, alertan SIMEGA e CESM. Médicos levan semanas esgrimindo estas reivindicacións en protestas ante a Xerencia do SERGAS en Ourense. Por agora, a Xunta non lles fixo caso.
O Sindicato Médico de Galicia (SIMEGA), afiliado á Confederación Estatal de Sindicatos Médicos (CESM), manifestou o seu respaldo á médicos da área Sanitaria de Ourense-Verín-O Barco de Valdeorras, quen protagonizaron concentracións durante semanas para esixir a cobertura de prazas estruturais vacantes.
As demandas dos facultativos inclúen a solicitude das prazas necesarias en cada especialidade hospitalaria e primaria, así como a proposta de ampliar a oferta da Oferta Pública de Emprego (OPE) 2024 na área de Ourense. Isto, entende a central, implica ofertar como de difícil cobertura as prazas requiridas para as especialidades deficitarias.
Estas críticas coinciden coas lanzadas hai unha semanas polo Colexio de Médicos de Ourense. Este colectivo alertou que existen varias especialidades que soportan enormes listas de espera e que a práctica están preto de colapsar.
Entre as peticións, atópase a igualdade de condicións nos contratos ofrecidos en comparación con outras áreas, sen condicionar os novos contratos á cobertura obrigatoria de hospitais comarcais, que en ocasións implican desprazamentos de até dúas horas. Esta condición, argumentan, contribuíu á fuga de profesionais.
Ademais, os médicos de Ourense demandan protocolos de continxencia de sobrecarga asistencial para xestionar de maneira regrada e transparente a carga de traballo, adaptados a cada especialidade e o seu nivel de complexidade. Consideran que isto é fundamental para garantir a protección da saúde tanto dos pacientes como dos facultativos.
SIMEGA apoia tamén a solicitude de mellorar a eficiencia na xestión do tempo, priorizando o labor asistencial e delegando as tarefas administrativas nos responsables correspondentes.
Por último, o sindicato considera xusta a demanda dos médicos de Ourense para que se cumpra coa orde do 11 de maio de 2022, ou na súa falta, o establecido no Decreto 144/2001 do 7 de xuño, en canto a indemnizacións por razón de servizo, especialmente no relacionado con transporte intercentro e dietas de desprazamento, así como a adaptación de axendas ao horario de actividade.
Escribe o teu comentario