A empresa de seguridade do HULA, Salzillo, violou os dereitos dun vixiante de baixa
O xulgado do Social número 4 de Lugo condenou á empresa Salzillo Seguridade, responsable da seguridade do hospital Lucus Augusti, en Lugo, a abonar as diferenzas salariais derivadas do período que estivo de baixa por enfermidade común un traballador, o que supón máis de 2.800 euros.
Este fallo, con data de 29 de abril de 2024, dá a razón á reclamación formulada polo demandante a través de CSIF, o que obriga á empresa a abonar as cantidades pendentes, tendo en conta que esta recoñeceu a categoría profesional do empregado e a súa vinculación contractual coa compañía, así como a xornada laboral desempeñada.
Os servizos xurídicos de CSIF Lugo celebran "unha nova sentenza favorable aos dereitos dos seus defendidos". En concreto, trátase dun vixiante de seguridade do hospital que exerce as súas funcións desde o 1 de xullo de 2018, a xornada completa e con contrato indefinido.
O fallo, que é firme e non cabe interpor recurso, establece a obrigatoriedade de abonar as diferenzas salariais durante todo o período da incapacidade temporal, comprendido entre maio de 2022 e febreiro de 2023. A empresa non abonou o importe íntegro da cotización á Seguridade Social que lle correspondía ao demandante.
Escribe o teu comentario