O líder do PSdeG dará "todas as facilidades" á fábrica de ENCE nas Pontes pero pide aclarar se depende de subvencións

O alcalde das Pontes e líder do PSdeG aplaude o anuncio de ENCE de instalar unha fábrica de papel alí. Agora ben, Valentín González Formoso tamén pide cautela, sobre todo ante a posible dependencia dos fondos europeos, os Next Generation. 

O socialista solicita a ENCE explicar se a viabilidade do proxecto depende destes e fondos públicos. No caso dos Next Generation de Bruxelas, os que se distribuirán para proxectos así están aínda por adxudicar.

Formoso asegura que xa dialogou coa empresa e lembra que  "o que anuncia é unha intención de iniciar uns estudos e facer unhas solicitudes".  

POTENCIALIDADES DAS PONTES

En todo caso, o alcalde aclara que As Pontes ten "os brazos abertos" e que poñerá "todas as facilidades todas as de mundo". O político enumera as vantaxes das Pontes, entre as que enumera que "estamos xusto en o eixo de maior produción forestal de Europa, entre Ferrol e A Marila", "unha gran fonte de auga para subministración de auga crúa industrial", traída de "gas natural de alta presión" e "mentalidade industrial". 

A principal pega que ve Formoso é que a presunta dependencia das axudas porque"a experiencia que temos de grandes proxectos que ao final tiñan grandes dependencias de fondos públicos".

TRASLADAR A FÁBRICA DE LOURIZÁN Ás PONTES?

ENCE anunciou, tras unha reunión coa Xunta, que proxecta investir uns 220 millóns nunha factoría de papel tisú. A empresa indica que a nova fábrica é complementaria á polémica factoría de Lourizán, cuxo futuro está dependente da Xustiza. O PP, a Xunta e a empresa queren que siga en Pontevedra, os partidos de esquerda e o alcalde pontevedrés levan lustros defendendo o seu traslado.

A proximidade de enormes masas de eucalipto, as boas comunicacións e presenza do lago das Pontes sobre a antiga mina da central térmica fan, en teoría, viable que a fábrica de Pontevedra trasládese ás Pontes. De feito, hoxe o alcalde de Pontevedra, Fernández Lores (BNG), dixo que o proxecto representa unha oportunidade para sacar a produción de Lourizán. 

A térmica que opera Endesa As Pontes traballou estes meses ante a alta demanda de enerxía, pero está en marcha o seu proceso de clausura definitiva. O plan da pasteira di que crearía uns 150 postos de traballos directos e uns 400 indirectos, de saír adiante, nas Pontes.