A Garda Civil atopa un cadáver e case 200 plantas de marihuana nunha casa de Negreira
O falecido non presentaba signos de violencia. Na inspección policial, acharon 184 plantas de cánnabis da variedade sativa.
Tras o descubrimento, as pescudas dos axentes permitiron atopar ao presunto colaborador do falecido, que está a ser investigado.
Foto: EP
A Garda Civil do Posto de Negreira (A Coruña) mantén como investigado a un veciño da localidade, como suposto autor dun delito contra a saúde pública, tras atopar unha plantación de 184 plantas de cánnabis.
O descubrimento produciuse despois de localizar os efectivos un cadáver nunha vivenda do municipio coruñés, o pasado 23 de maio. Ao acceder a ela, acharon no seu interior o corpo sen vida do morador, que non presentaba signos de violencia.
A Garda Civil tamén realizou entón unha inspección ao domicilio para atopar probas do que sucedeu, momento no que localizaron 184 plantas de cánnabis sativa.
Ademais, acharon varias bolsas de plástico que contiñan cogollos secos das plantas, cun peso total de 540 gramos; 12 lámpadas de cultivo; tres deshumificadores; un extractor; seis ventiladores e varios programas de corte eléctrico.
A Garda Civil incautou os efectos e iniciou a investigación para coñecer se a plantación pertencía só ao falecido ou tiña colaboradores. Coa información solicitada, lograron identificar o colaborador, investigado agora como suposto autor dun delito contra a saúde pública. Mentres, os efectos incautados foron postos ao dispor do Xulgado de Instrución e Primeira Instancia de Negreira.
Escribe o teu comentario