A Xunta non levanta restricións pero si as rebaixa: abren as barras, novo horario na hostalería e concertos de pé​

A pesar da melloría nos datos de Galicia, a Xunta optou por ser conservadora á hora de afrontar a desescalada despois das restricións aplicadas en Fin de Ano e que aínda pesan na comunidade.

Sanidade anunciou novas medidas que afectan á hostalería e ao lecer nocturno -novos horarios e aforos-, así como á celebración de concertos. Tampouco haberá xa toque de queda, pero non parece que a Xunta vaia a rebaixar o tempo de corentena. 

Terrazas en Galicia | Foto: EP

O conselleiro de Sanidade, Julio García Comesaña, confirmou a reapertura das barras da hostalería para o consumo, a ampliación de horario para a hostalería (á 1 pola semana e 1,30 horas a fin de semana) e en lecer nocturno (ás 4 pola semana e ás 5 a fin de semana) e poderán celebrarse os concertos e espectáculos con público de pé, con máscara.

Tamén queda suprimido o límite de reunións entre persoas que non conviven e que estaba vixente entre as 3 e as 6 da madrugada.

As mesas mantéñense con oito comensais en interior e amplíanse a 15 nas terrazas e exteriores. Poderán servirse cócteles de pé, coas correspondentes medidas de seguridade.

Mentres, o certificado covid para a hostalería e o resto de actividades nas que está vixente --como os ximnasios, albergues e hospitalización de día e acompañamento de pacientes-- ampliarase.

Isto supón unha volta ás medidas anteriores ao final da época do Nadal e que no último Diario Oficial de Galicia (DOG) foron estendidas ata o 12 de febreiro.