​Do saneamento lineal ao circular na loita contra o cambio climático

Investigadores da Unidade Mixta Cigat Biofactoria

Os episodios climáticos extremos, como inundacións e secas, e o aumento do nivel do mar que provoca o quecemento global son un grave risco para os elementos dos sistemas de saneamento (as tubaxes, os tanques e as plantas de tratamento). Iso obriga a dotar aos territorios, urbanos e rurais, de sistemas máis resistentes e adaptados á nova situación climática.

O 19 de novembro celébrase o Día Mundial do Saneamento (ou tamén chamado do Retrete), promovido por Nacións Unidas. Este ano a celebración pon o foco nos 3.600 millóns de persoas en todo o mundo que carecen de servizos de saneamento xestionados de forma segura. Máis aló de ser un dereito, é necesario que todas as persoas dunha comunidade dispoñan de retretes para protexer a súa saúde de maneira transversal. Por iso, auga e saneamento para todos é o sexto dos Obxectivos de Desenvolvemento Sostible (ODS), a guía mundial para un mundo máis xusto e sostible.

VIAQUA IMPULSA A TRANSFORMACIÓN DAS súas DEPURADORAS EN BIOFACTORÍAS

Aínda con niveis altos de desenvolvemento, España, ten camiño a percorrer en materia de augas residuais. A Unión Europa indica aos seus estados membros a necesidade de seguir apostando polo tratamento avanzado nos sistemas de depuración. Iso supón investir, cun modelo de colaboración público-privada, de maneira sostida nas instalacións para atender as directivas europeas e para lograr sistemas máis resistentes ante o impacto do cambio climático.

Viaqua, comprometida co saneamento de calidade, durante o ano 2020 tratou 73,4 hectómetros cúbicos de augas residuais (o equivalente ao consumo anual de máis da metade da poboación galega!). Para facer fronte ao desafío climático e facer máis sostible todo o proceso, Viaqua impulsa a evolución das depuradoras tradicionais en “biofactorías”, un novo concepto baseado na economía circular.

Infografia que explica o cambio de modelo 

Estas instalacións rexeneran, mediante sistemas de tratamento avanzado, toda a auga que tratan, o que permite a súa reutilización en novos usos, como a rega de zonas verdes ou a agricultura. Ademais, valorizan todos os residuos xerados durante a depuración e se autoabastecen de enerxía.

Concretamente en Galicia, Viaqua está a levalo a cabo canda a Unidade Mixta Cigat Biofactoría, a través da colaboración co centro tecnolóxico da auga Cetaqua e a Xunta de Galicia a través da Axencia Galega de Innovación (GAIN). Esta unidade mixta ten como obxectivo a recuperación de compoñentes presentes en correntes residuais para obter produtos con alta demanda no mercado.

Ademais, busca reducir os custos de instalación e explotación dos procesos tradicionais de tratamento de residuos e definir novos modelos de negocio, que permitan obter un retorno económico aos produtores a partir das correntes residuais, implementando o modelo de biofactoría cara á procura do residuo cero.

A IMPORTANCIA DE NON TIRAR RESIDUOS AO INODORO

Con motivo do Día Mundial do Saneamento, Viaqua quere lembrar a importancia de non tirar residuos polo inodoro, tales como cabichas, aceite, produtos para o coidado persoal (toalliñas hixiénicas, cueiros de bebés, bastoncillos de algodón, discos desmaquillantes, tampones, etc.), así como medicamentos, un mal hábito cunha custosa factura económica e ambiental.

Segundo a Asociación Española de Abastecemento de Augas e Saneamento (AEAS), nunha cidade española duns 300.000 habitantes recóllense ao redor de 10 quilogramos destes residuos por persoa ao ano. Estes desperdicios obstruen as canalizacións e supoñen un sobrecusto total estimado duns 230 millóns de euros ao ano.