Ditarlle galego ao móbil? A Xunta traballa en solucións pero estima 10 anos para acabar cos déficits
O secretario xeral de Política Lingüística, Valentín García, avanzou que a Xunta traballa nun "gran proxecto" para potenciar a incorporación do galego a dispositivos de control por voz.
Política Lingüística adianta un "gran proxecto" cunha " base fonética, morfolóxica e sintáctica" que facilite incorporar o idioma propio de país a programas de control ou ditado por voz
O secretario xeral de Política Lingüística, Valentín García, avanzou que a Xunta traballa nun "gran proxecto" para potenciar a incorporación do galego a dispositivos de control por voz.
Durante unha comparecencia realizada na Comisión 4ª, Educación e Cultura do Parlamento galego este venres ante unha pregunta do BNG , o secretario xeral emprazou a un período dunha década para que sexa posible "ter interlocución (oral) con todo tipo de mecanismos".
Por iso, detallou que o Executivo autonómico traballa no desenvolvemento de "unha grandísima base fonética, morfolóxica e sintáctica" do galego que deberá "ser compatible coas tecnoloxías de todo o mundo" para permitir a súa incorporación a dispositivos que ofrezan un control por voz.
Así mesmo, o secretario xeral puxo en valor o traballo realizado para fomentar a utilización do galego por parte de mozos a través de campamentos e accións de promoción da lingua como a levada a cabo no marco do Resurrection Fest, que se celebra en Viveiro (Lugo).
PROMOCIÓN EN FESTIVAIS MUSICAIS
Pola súa banda, o deputado do BNG Daniel Castro incidiu na necesidade de traballar para permitir que os dispositivos que utilicen a intelixencia artificial incorporen o galego dado que este sistema representará "un elemento máis para comunicarse" no futuro. Así, recalcou a importancia de permitir que un mozo poida "vivir as 24 horas (do día)" na lingua propia da comunidade, para o que asegurou que resulta preciso fomentar a incorporación deste idioma a dispositivos e redes sociais.
Escribe o teu comentario