Senra e as mulleres afectadas insisten en que a charla cancelada por Caballero non era contra as vacinas

|

A eurodeputada Lídia Senra lamentou este luns que o Concello de Vigo cancelase a xornada 'Mulleres e Saúde', organizada para este sábado 15 de decembro e defendeu que non se incluíu ningunha charla "antivacinas" como se argumentou para esta suspensión do acto.


Lida Senra


Nun comunicado, a eurodeputada do GUE/NGL, que no seu día foi obxecto de polémica por unha pregunta na que cuestionaba sobre as vacinas, explicou que ata este luns, ás 13,21 horas, non recibiu a comunicación do Museo de Arte Contemporánea (MARCO) de Vigo a suspensión das xornadas, algo que o Concello xa confirmou o pasado sábado.

Para a eurodeputada, trátase dunha "grave vulneración do dereito á liberdade de expresión impropia dunha democracia". Ademais, advertiu de que é "falso" que a xornada fose "antivacinas" e lembrou que, como indica o título, estaba centrada en analizar "aspectos referidos especificamente coa saúde das mulleres".

Concretamente, segundo figura no programa, estaba previsto que interviñesen a partir das 11,00 horas, a presidenta da Asociación Galega para a Defensa da Sanidade Pública, María Luisa Lores, e Carmiña Mosquera, que traballou como epidemióloga da Consellería de Sanidade en Asturias.

ASOCIACIÓN AFECTADAS DA VACINA DO PAPILOMA
Ademais, foi convidada a presidenta da Asociación de Afectadas pola Vacina do Papiloma, Alicia Capela, que tiña previsto falar desta vacina --que só se fornece ás mulleres-- polas consecuencias que tivo na súa filla. "Resulta obvio, por tanto, que non é unha persoa en contra das vacinas", sinala Lídia Senra.

Na súa páxina web, a asociación, que no 'banner' principal xa sinala que "son vítimas, non antivacunas", colgou un comunicado no que lamentan que lles desacreditaran "" e no que explican que non son un movemento "antivacinas", senón que queren que se estuden os efectos adversos da do virus do papiloma.

Así, entre outras cuestións, explican que desde o ano 2009 "solicitaron ás autoridades sanitarias que se informe aos cidadáns dos posibles riscos das vacinas do papiloma, que se realice unha farmacovigxlancia efectiva e que se recoñezan os efectos adversos que 'as nosas fillas' padeceron tras recibir estas vacinas".

"Desgraciadamente se nos ignorou como colectivo. Primeiro dicindo que esta vacina non produce efectos adversos, despois argumentando que somos as vítimas as causantes das nosas enfermidades, e por último chamándonos antivacinas", lamenta o escrito explicativo colgado na súa páxina web.

POSICIÓN DE EN MAREA
Preguntado por esta cuestión en rolda de prensa, o portavoz de En Marea, Luís Villares, insistiu en que a súa formación "cre" nas vacinas como un "tratamento de prevención de enfermidades", así como defende a inclusión das vacinas no sistema sanitario.

Así, remitiu ás demais explicacións a Lídia Senra, quen como eurodeputada desvinculouse da que no seu día era a súa candidatura (Alternativa Galega de Esquerda en Europa, integrada na lista da Esquerda Plural). Actualmente, Senra forma parte da candidatura de Luís Villares para a renovación dos órganos de dirección de En Marea.

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial
Powered by Bigpress