Piragüismo, fútbol e atletismo son as disciplinas con máis deportistas galegos de alto nivel
A inclusión na listaxe permite solicitar as axudas da Xunta para, entre outros fins, a preparación e participación dos deportistas nos Xogos Olímpicos e Paralímpicos de París 2024.
O Diario Oficial de Galicia publicou a resolución do 15 de marzo de 2024 sobre a relación vixente de deportistas de alto nivel, alto nivel vitalicio, alto rendemento, rendemento deportivo de base, xuíces, árbitros e técnicos. Actualmente, o número total de deportistas galegos recoñecidos bate marca e chega xa a 1.173, con 458 mulleres (40%) e 715 homes (60%).
Ao redor do 78% de todos os recoñecidos (911) son deportistas galegos de alto nivel (344 mulleres e 567 homes). Ademais, hai 121 deportistas de rendemento deportivo de base (63 mulleres e 58 homes); 85 deportistas de alto rendemento (30 mulleres e 55 homes); 30 técnicos de alto nivel (catro mulleres e 26 homes); 16 árbitras e xuízas (doce mulleres e catro homes); e dez deportistas galegos de alto nivel vitalicios (cinco mulleres e cinco homes).
Entre estes DGAN vitalicios, atópanse deportistas como Carlos Arévalo, Carlos Pérez 'Perucho', Teresa Portela e Cristian Toro (piragüismo), Támara Echegoyen, Nico Rodríguez e Sofía Toro (vela), Adi Igrexas (atletismo adaptado), Susana Rodríguez Gacio (paratríatlon) e Chano Rodríguez (natación adaptada).
Destacan tamén que, entre todas as categorías, están recoñecidos 37 deportistas galegos con diversidade funcional, o número máis alto da historia (13 mulleres e 24 homes).
As 10 federacións deportivas con máis deportistas recoñecidos son piragüismo (172), fútbol (82), atletismo (82), salvamento e socorrismo (80), taekwondo (80), patinaxe (55), vela (55), remo (53), halterofilia (33) e tríatlon e péntatlon moderno (32).
Escribe o teu comentario