Empeza a vacinación contra o virus do papiloma humano para homes de até 25 anos

A Xunta comezará este luns a vacinación fronte ao virus do papiloma humano (VPH) a todos os homes de até 25 anos de idade. Poderán vacinar todos os mozos nados desde 2001.

Segundo informou o Executivo galego nun comunicado, a pauta de vacinación consistirá na administración dunha soa dose, de acordo ás recomendacións vixentes e simplificando o proceso de inmunización.

As persoas que queiran inmunizarse fronte ao virus do papiloma humano poderán pedir a cita mediante a aplicación do Sergas ou chamando ao seu centro de saúde.

Tras diferentes ampliacións da cobertura, a inmunización dos mozos foise estendendo até loa 19 anos, despois até os de 21 e agora chega aos mozos de até 25 anos.

Pola súa banda, a vacinación da poboación feminina foi incluída de forma sistemática no programa galego desde 2008.

A Xunta indicou que, co obxectivo de reducir a circulación do virus entre a poboación galega, destina unha partida de 982.827 euros para vacinar a 21.000 homes nados entre 2001 e 2003.