Folga de celadores: fixados os servizos mínimos nos quirófanos do CHUAC

O colectivo de celadores do servizo de quirófano-reanimación do Hospital Universitario da Coruña está convocado para un paro de 1 hora o próximo 17 de novembro. A protesta, entre as 8 e as 9 horas da mañá, xa ten resposta por parte da Consellería de Sanidade, que fixou os servizos mínimos para a ocasión. 

"FUNCIÓNS IMPRESCINDIBLES"

O paro laboral, que comprende a toda o persoal de celadores que opera no servizo de quirófano e reanimación, terá un impacto mínimo na operatividade do centro, porque a Consellería comprende que se trata dun colectivo que desempeña "funcións imprescindibles". 

Así o reflicte na orde publicada este venres no Diario Oficial de Galicia (#DOG), onde sinala expresamente que a folga "podería impedir a realización de intervencións cirúrxicas urxentes, comprometer a seguridade dos pacientes anestesiados ou en reanimación e dificultar a resposta ante emerxencias intraoperatorias".

Desta forma, o DOG establece que os servizos mínimos deben estar compostos por catro celadores en quirófano, un na área de espera de camas, tres na reanimación quinta e un en reanimación terceira. Ao tempo, engaden que aqueles profesionais designados como servizo mínimo que mostren o seu desexo de acudir á folga poderán solicitar a substitución da súa designación por outro traballador ou traballadora que, de maneira voluntaria, acepte o cambio.