"Hai alumnos que levan un curso sen atención educativa": STEG reclama profes para o Hospital Teresa Herrera

Aínda que o curso escolar arrincou oficialmente o pasado 11 de setembro, hai moitos estudantes que non puideron asistir con normalidade ás clases. É o caso dos menores ingresados na área infanto-xuvenil de psiquiatría do Hospital Álvaro Cunqueiro, que estiveron durante meses sen profesor de Secundaria na aula pediátrica. As presións das familias dos adolescentes e del Sindicato de Traballadoras e Traballadores do Ensino (STEG) lograron, tras moitas semanas de reunións e denuncias, que a Consellería de Educación asignase un docente ao hospital olívico, tal e como contaba o pasado curso. Aínda que parece que a situación se resolveu satisfactoriamente, o de Vigo non é o único centro en problemas, e agora desde STEG dirixen a súa atención ao norte, máis concretamente á Unidade de Saúde Mental infanto xuvenil da área da Coruña e Cee.

A HISTORIA REPÍTESE

O sindicato reclama á Consellería de Educación o docente que, por normativa, correspóndelle a esta unidade. Desde STEG mantiveron encontros coas familias e co persoal do centro, que demandan este reforzo para que os escolares poidan seguir co correcto desenvolvemento do curso lectivo e reciban a formación que lles corresponde por dereito. 

Neste sentido, desde STEG pon o acento nos casos máis sanguentos, con alumnos que levan "máis dun curso sen asistir ao centro escolar e sen ningún tipo de atención educativa". En total, hoxe son máis dunha vintena de pacientes en hospitalización de día por trastornos de saúde mental no Hospital Materno Infantil Teresa Herrera da Coruña, con menos dun ano de vixencia desde que abrise as súas portas. 

"Este centro debería contar no seu cadro de persoal, xunto coas profesionais de psiquiatría e psicoloxía,
enfermeiros e traballadores sociais, canto menos cunha docente, tal e como recolle a normativa que regula a atención á diversidade educativa en Galicia", destaca o sindicato no seu comunicado, á vez que salientan que neste momento estes mozos "non reciben ningún tipo de atención educativa". 

"A situación é a mesma que se daba na área de psiquiatría do Hospital Álvaro Cunqueiro e no Hospital de día de saúde mental Nicolás Peña de Vigo ata que, tras presións das familias e deste sindicato, o departamento dirixido por Judith Fernández accedese a asignar unha docente a finais do pasado mes de novembro", lembran.

ESTUDANTES EN SITUACIÓN DE VULNERABILIDADE

Trátase, en todo caso, de adolescentes na súa maioría nunha situación de especial vulnerabilidade que non poden acudir ao seu centro escolar con regularidade, o que provoca que moitos se "descolguen" do curso, dificultando aínda máis a súa recuperación e, en ocasións, mesmo agudiza o seu estado. De feito, tal e como indican os sanitarios, a atención virtual, que é a que impulsan desde a Xunta de Galicia, non é a axeitada para a correcta e pronta sanación dos raparigos. 

A atención e acompañamento dun docentes pode axudalos a regresar ás clases presenciais e ser un apoio fóra do ámbito familiar, refiren desde STEG. Así, a coordinadora da Unidade de Saúde Mental Infanto Xuvenil do Hospital Materno da Coruña, a psiquiatra Laura Vigo, acusa á Xunta de darlles a escoller entre "atención educativa e tratamento". "Ambaso son indisociables", sentencian.