O SERGAS forma profesionais para atención a persoas xordas

O Servizo Galego de Saúde, a través da Axencia de Coñecemento en Saúde, formou a 15.301 profesionais na atención ás persoas xordas a través dos cursos sobre 'A comunicación coas persoas xordas na consulta e Servizo de videointerpretación na atención sanitaria urxente ás persoas xordas'.

Segundo informou a Xunta, en concreto, 12.751 profesionais do Sergas superaron o curso online sobre 'A comunicación coas persoas xordas na consulta'.

Esta formación conta con máis de 17.000 persoas inscritas e espertou un especial interese desde a súa inclusión, por parte da Dirección Xeral de Recursos Humanos, como puntuable para a carreira profesional en todas as categorías do Sergas.

Até o momento, 4.282 profesionais de enfermaría conforman a categoría con maior representación que superou o curso sobre comunicación na consulta; 3.289 técnicas en coidados auxiliares de enfermaría (TCAE); 1.272 celadores; e 752 auxiliares da función administrativa.

No referente ao curso sobre o Servizo de videointerpretación na atención sanitaria urxente ás persoas xordas foi superado actualmente por 2.550 profesionais.

Neste caso, o curso está destinado unicamente a persoal dos servizos de urxencias hospitalarias e puntos de atención continuada, dado que son os servizos onde se emprega a videointerpretación as 24 horas.

A categoría con máis número de persoas que xa superaron o curso sobre videointerpretación é a de técnicas en coidados auxiliares de enfermaría (TCAE), con 649; seguida de enfermaría, con 642; celador, con 413; e persoal de servizos xerais (PSX), con 391.