Xubilación aos 72 anos? Colexios médicos veno un "granito de area", a oposición un "parche" e o PP apóiao

A idade de xubilación voluntaria dos médicos en España xa se atrasou até os 70 anos e agora a Xunta e outras autonomías solicitan poder atrasala até os 72.

Algúns galenos xa poden acoller a unha xubilación parcial que lles permite traballar e cobrar até o 75 por cento da pensión.

A petición de que os médicos galegos poidan seguir no SERGAS até os 72 anos non é nova. Xa a enarborou, por exemplo, o conselleiro de Sanidade na reunión da semana pasada cos alcaldes de Pontevedra sobre a falta de sanitarios. É máis, autonomías como Galicia ou Asturias lévano propondo hai varios anos. Tamén algúns sindicatos como, por exemplo, a Confederación Estatal de Sindicatos Médicos (CESM).

Por que se pon entón agora de actualidade? O motivo de fondo é que os problemas en Atención Primaria seguen sendo evidentes, con ducias de miles de galegos tendo que esperar semanas para ver ao seu médico de familia ou pediatra. 

Existe, ademais, unha dinámica de cada vez maior presión política e social en vésperas, non o esquezamos, dunhas eleccións locais. Nestes momentos hai sindicatos como Ou'Mega que están a valorar convocar unha folga no SERGAS. De feito, onte organizou unha asemblea en Santiago e pronto as haberá noutras áreas sanitarias. Ademais, a plataforma SOS Sanidade Pública prepara unha gran manifestación en Compostela nas próximas semanas.

Neste contexto, avivar o debate sobre o atraso da idade de xubilación no SERGAS útil á Xunta, pois visualiza que o goberno está a demandar ao Estado -quen é o competente para aprobala no seu caso-  unha medida que comparten algúns galenos, pois hai que lembrar que estamos a falar de xubilación voluntaria aos 72, non obrigatoria.  

Disquisiciones políticas e sindicais á marxe, é útil que os médicos do SERGAS poidan atrasar a súa idade de xubilación dos 70 aos 72 anos? e, sobre todo, serviría para atallar o perentorio problema da Atención Primaria?

BOA IDEA, PERO INSUFICIENTE, INDICAN Os COLEXIOS

Entre os partidos políticos, as respostas a estas cuestións varían en función da súa ideoloxía e de si están ou non na oposición. Entre os colexios médicos, vese con bos ollos, pero tamén con certo escepticismo.

Así, o recien nomeado presidente do Consello Galego de Colexios de Médicos entende que  pode ser un primeiro paso útil pero que non é suficiente, necesítanse medidas de maior calado.  Eduardo Iglesias García explicou hoxe en Radio Galicia que a ampliación da idade de xubilación non basta para liquidar o problema porque non serve para atraer a máis novos galenos á Atención Primaria do SERGAS.

O tamén presidente do Colexio Oficial de Médicos de Lugo lembrou que "eles valoran máis a súa vida persoal que o traballo" polo que demandou medidas que, por exemplo, permitan aos novos médicos conciliar a súa vida profesional e familiar. 

Aínda que insuficiente, García apunta que "moita xente prolonga a súa vida laboral porque lle gusta o seu traballo", polo que a medida pode ter algún impacto, aínda que "a longo prazo hai que implementar outras solucións".

Nunha liña similar pronúnciase José Luís Jiménez, do Colexio de Médicos de Ourense. Na súa  opinión, a proposta suporía "un pequeno granito de area pero que non resolve o problema básico da Atención Primaria, que é a non adecuación entra a oferta e a demanda". 

Jiménez valora que non vai liquidar a actual crise, a pesar de ir polo bo camiño. De paso, lémbralle á Xunta que "a rixidez é mala conselleira".

ATAQUES DESDE A ESQUERDA

Moito máis duros e explícitos son os políticos da oposición. Desde o Bloque táchase a proposta de "parche" que "non responde as necesidades do sistema sanitario". Son palabras da deputada Olalla Rodil, que aposta por "deixar de recortar" e "garantir un investimento suficiente". O BNG reclama, por exemplo, que polo menos o 25% do orzamento do SERGAS vaia a Atención Primaria.

Os socialistas tamén opinan que o atraso da idade de xubilación é do todo insuficiente. O seu portavoz no Parlamento de Galicia Luís Álvarez (#PSdeG) táchao de "ocorrencia" e de "pau de cego". "Non sabemos si esas medidas están consesuadas cos colectivos ou son ocorrencias para reducir o impacto das xubilacións, que eran totalmente previsibles".

DAQUELES VENTOS ...

Álvarez pon o dedo na chaga da Xunta. Tras explotar a burbulla do ladrillo, os gobernos de Alberto Nuñez Feijóo aplicaron unha política de "facer máis con menos". No SERGAS isto traduciuse, por exemplo, en ofrecer horas extras aos médicos en persoal en detrimento o número de novos galenos con contratos estables.

A precariedade resultante axudou a empuxar a miles de médicos á emigración ou a privada. Agora estamos a pagar o que os expertos levan anos advertindo, o persoal do SERGAS é cada vez máis vella e ten cada vez máis traballo porque atende a unha poboación que tamén é cada vez máis vella.

Como era previsible, o único que se pronunciou claramente a favor da proposta foi o PPdeG. O portavoz parlamentario Pedro Puy dixo esta mañá que pode ser unha boa iniciativa. Puy aproveitou para volver culpar a Moncloa da falta de sanitarios e, cuestionado polas opinións dos seus rivais políticos, indicou que "a oposición non está a ser moi razoable".