Rafa Domínguez, do PP de Pontevedra, tampouco acudirá aos touros: "Fun unha vez con 15 anos e xurei non volver"

O líder dos populares na cidade do Lérez foi rotundo sobre a celebración de corridas en Pontevedra: "Se son alcalde de Pontevedra non me verán na praza".

A pesar de todo, manifestou que esta é en todo caso unha manifestación "persoal" que "respecta" aos que van á praza, igual que aos que non van e aos que se manifestan en contra.

O portavoz municipal do PP en Pontevedra, Rafa Domínguez, asegurou este xoves que o nivel das festas locais "é mellorable", pero confirma que se é alcalde manterá celebracións como Feira Franca, o festival Surfing The Lérez ou o Salón do Libro. Ademais, engadiu que non asistirá a ningunha corrida de touros e que "respecta" aos que van á praza, igual que aos que non van e aos que se manifestan en contra.

"Manter o que funciona, romper coa monotonía e a falta de ideas e mellorar a programación", é o que avanza o popular Rafa Domínguez sobre como proxectará as festas que se celebran na cidade se chega á Alcaldía, dado que será candidato popular nas eleccións municipais do ano próximo.

O PP NON TERMINARÁ COA FEIRA FRANCA

Segundo asegurou este xoves nunha rolda de prensa, a xente pregúntalle que pasará coas festas, especialmente pola Feira Franca, se chega á Alcaldía. Domínguez declarou que a súa intención "é quedar con todo aquilo que funciona e que é importante para a cidade". "E sen dúbida Feira Franca é un evento crave", manifestou o popular, quen garantiu que este evento manterase.

"Por tanto, cando oian a alguén dicir que o PP vai terminar coa Feira Franca ou co modelo de cidade, que saiban que é mentira", manifestou. Para o portavoz do PP, ese é "unha mensaxe dun goberno catastrofista que ten medo do que vén, que non é outra cousa que o cambio".

Nesta liña, e sobre a programación deste ano, Domínguez apuntou que o nivel é "mellorable" e afirmou que bota de menos "algún nome internacional importante".

TOUROS

Respecto a a Feira taurina da Peregrina, Rafa Domínguez apuntou que o PP é "o partido das liberdades individuais".

"En España e en Galicia é legal ir aos touros", remarcou, antes de defender que "se hai un promotor ou un empresario que quere facer unha festa e hai xente que vai, iso é legal e se é economicamente positivo para a cidade". "Mellor que mellor", esgrimiu, e avanzou unha postura similar á do actual rexedor, Miguel Anxo Fernández Lores (BNG), se chega a gobernar.

"Teño concelleiros e coñecidos que cren que é unha arte e os respecto. Eu fun unha vez aos touros con 15 anos e xurei que non volvería máis", indicou, para engadir, a continuación: "Pódolles asegurar que se son alcalde de Pontevedra non me verán na praza de touros para ver unha corrida, pero é unha posición persoal".

"Respecto á xente que vai á praza, aos que non van e respecto moi profundamente aos que se manifestan en contra os touros, creo que todos temos cabida en Pontevedra", resolveu.