Por que subirán moitos recibos da auga? Por culpa da Xunta, din alcaldes do PSOE, por culpa de Moncloa, di o PP

Está a forzar a nova Lei do Ciclo dá Auga unha subida dos recibos? En opinión de moitos alcaldes do PSOE, así é. En opinión da Xunta, esta queixa é unha simple escusa porque as subidas de prezos débense. en realidade, ás políticas de Moncloa. 

O certo é que, unha vez superadas as eleccións, moitos concellos están a empezar a revisar o prezo que lle cobran aos veciños. É o que figura, por exemplo, na orde do día do próximo pleno do Concello de Carballo.

Como era de esperar, os alcaldes -de todas as cores- tentaron aprazar a aplicación da nova Lei até despois das eleccións. Superados os comicios locais e estatais, agora ven en a obrigación de abordar melloras que implican máis gasto e, por tanto, a necesidade de executar a impopular medida de subir o recibo da auga.

A Lei establece unha serie de obrigacións, por exemplo en reducir as perdas na rede como marca a normativa europea. Unha redución de fugas que é vital dado o contexto hídrico que está a provocar o cambio climático. Son parámetros que algúns concellos xa cumprían, pero outro non. Algúns xa cobraban un canon ad hoc por tales melloras, pero outros ven empuxados agora a establecelo.

ALCALDES NON QUEREN PERDER PODER

Os socialistas organizaron esta semana un conclave de alcaldes críticos coa norma que acusan á Xunta de estrangularlles financieramente. Respondeulles a conselleira de Infraestruturas acusándoos de "enredar" e insistindo no suposto carácter voluntario da cesión da xestión da rede ao ente autonómico Augas de Galicia.

Simplificando moito, a Lei do Ciclo da Auga establece unha serie de melloras que moitos concellos deben abordar rascando o seu propio peto -forzándolles a subir os recibos- ou poden, voluntariamente, tamén ceder a xestión do servizo á Xunta, a Augas de Galicia, que fará os investimentos necesarias. 

Logicamente, ceder o controldel servizo á Xunta, aínda que sexa parcialmente e só da xestión diaria,  non gusta a case ningún alcalde. Entre outros motivos, porque perderían poder á hora de adxudicar contratos dun dos servizos máis importantes. Nesta liorta hai, por tanto, un compoñente de loita poder entre concellos e Goberno Autonómico, sobre todo entre concellos rurais e de tamaño medio, que son os que non teñen músculo financeiro para cumprir os requisitos sen ter que subir recibos ou ceder competencias.

17 REPRESENTANTES SOCIALISTAS

O secretario de organización do PSdeG, José Manuel Lage Tuñas, e o secretario de política municipal e presidente da Fegamp, Alberto Varela, reclamaron unha reunión urxente coa Xunta. Fixérono tras unha reunión onte con representantes de Camariñas, Carballeda de Avia, Cedeira, Cambados, Vilagarcía, O Grove, Gondomar, Vilaboa, Cuntis, Ourol, Negueira de Muñiz,  Monforte, Celanova, Maside, A Pobra do Caramiñal, Neda e Soutomaior.

Varela, alcalde de Vilagarcía, indicou que a Xunta impón cada vez máis competencias aos gobernos locais con peticións que "nunca, absolutamente nunca, van acompañadas de financiamento" para aplicalas, o que conduce a unha situación "#insosteible".

O presidente do ente que aúna aos concellos cre que a Xunta debería dar marcha atrás por estar a cargar aos municipios con gastos en momentos que xa son "moi complicados" para as administracións locais. Segundo Varela, as obrigacións impostas aos municipios son cada día maiores con "competencias impropias".

Pola súa banda, Lage Tuñas advertiu que a petición dunha reunión é unha última chamada ao diálogo. Pola contra, "só queda unha vía de confrontación, sen descartar que se poida chegar a unha vía xudicial".

En opinión do número dous do PSdeG,"o que están a facer cos municipios é unha arbitrariedade  e evidencia que a "forma de actuar" do presidente da Xunta, Alfonso Rueda, e da súa conselleira de Infraestruturas, Ethel Vázquez, é "similar á de señores feudais que someten a aqueles que non rin as grazas".

SAN CAETANO CULPA A MONCLOA

Respondeulle o mesmo día a responsable de Infraestruturas. Ethel Vázquez achaca "ás políticas do Goberno" do aumento do prezo da auga polo incremento da luz mentres asegurou que a normativa galega "non crea ningunha taxa nova aos usuarios nin incrementa o recibo da auga".

"Quen emiten facturas da auga son os municipios, quen deciden os modelos de xestión do ciclo integral da auga son os municipios"

"Lamentamos que o Partido Socialista esqueza o que son as competencias e responsabilidades municipais na xestión da auga e confunda subir impostos con mellorar a xestión e o servizo da auga. Quen emiten facturas da auga son os municipios, quen deciden os modelos de xestión do ciclo integral da auga son os municipios e, en consecuencia, son os que deciden as facturas", respondeu Vázquez.

A estes prezos afecta o prezo da luz, segundo dixo, "consecuencia das políticas do Goberno socialista de España".

Vázquez, iso si, recoñeceu entre liñas que a norma abre a porta a que a Xunta se faga cargo do servizo. "É unha lei para dar resposta a unha demanda e necesidade municipal nos municipios que non son capaces de xestionar as infraestruturas da auga. Son moitos municipios, mesmo do Partido Socialista, que queren adherir a ese modelo do ciclo integral da auga", dixo.

De feito, xa empezaron os movementos institucionais. Vázquez participou esta semana nunha reunión con concellos da área de Pontevedra que estudan crear un ente supramunicipal que lles permita abordar en conxunto -e co financiamento da Xunta- as melloras que establece a citada lei.