Enquisas xerais Galicia: ten o BNG opcións en Lugo ou Ourense? Pode Vox sacar algún deputado?

En termos xerais, as sondaxes mostran un avance do Partido Popular, un retroceso do PSOE, unha melloría do Bloque e un panorama incerto para Sumar.

Os conservadores sacaron dez deputados hai catro anos e as tres enquisas con datos de Galicia publicadas nos últimos meses apuntan a unha melloría dos de Alberto Núñez Feijóo. Os do PPdeG pasarían dos dez representantes actuais a unha pinza de entre once e catorce.

A outra cara da moeda sería para o Partido Socialista. Os de Pedro Sánchez sacaron tamén dez deputados nos pasados comicios e agora retrocedierían a unha pinza de entre nove e seis. Lograrían representación iso si en todas as provincias, aínda que en todas poderían perder algunha acta.

O #BNG avanza segundo as sondaxes, pois hai catro anos só conseguiu sentar a Néstor Rego como deputado pola Coruña e agora tería opcións de conseguir polo menos outro deputado pola provincia de Pontevedra. De feito, todas as enquisas publicadas a nivel estatal que non teñen datos desagregados por provincias nos últimos meses coinciden en dar dous deputados aos nacionalistas galegos, suponse que un pola Coruña e outro por Pontevedra..

Os datos sobre Sumar son os máis confusos, en parte debido a que a coalición non se formalizou até última hora debido aos problemas con Podemos.  As sondaxes varían nunha pinza de dúas a cero para os de Yolanda Díaz.

CANTOS VOTOS HAI QUE LOGRAR COMO MÍNIMO EN CADA PROVINCIA PARA TER OPCIÓNS?

Un dos aspectos máis relevantes son as cifras provinciais de Ourense e Lugo. As enquisas prognostican alí representantes outra vez só ao Partido Popular e ao Partido Socialista.  Ningún dos estudos outorga posibilidades ao BNG nesas provincias.  Isto débese a que a pesar da melloría dos nacionalistas, Lugo e Ourense elixen moi poucos deputados, só catro, e o sistema da lei D’Hont favorece aos partidos máis votados,  que todas as sondaxes apuntan serán nesas provincias socialistas e conservadores.

Segundo calculou José Antonio López no Ideal Galego este domingo, en Ourense houbo que sacar un mínimo duns 28.000 votos para aspirar a entrar na repartición. Hai catro anos o BNG conseguiu só 10.000 e Podemos 13.000. Con todo, nos locais os candidatos nacionalistas en Ourense lograron 26.000, polo que en teoría os nacionalistas si terían opcións de competir por unha acta nesa provincia, aínda que está claro que nos comicios locais non se vota igual que nas eleccións a Cortes.

En 2019, para sacar un deputado por Lugo houbo que asegurar polo menos tamén uns 28.000 votos como en Ourense. Nas eleccións de hai catro anos o Bloque conseguiu só . Con todo, nas locais recolleu máis de 30.000, polo que se tería opcións. 

Vox parece que o ten imposible en Lugo, pois nas locais cultivou menos de 2.000. Os ultranacionalistas españois tampouco parece que teñen opción en Ourense, onde hai uns meses só conseguiron 1.900 sufraxios.

Ten Vox opcións nas provincias que reparten máis deputados? O mínimo foi de 58.000 na Coruña hai catro anos.

 En locais Vox na Coruña conseguiu a penas 10.000 polo que non tería opcións. Con todo, nas pasadas xerais captou 50.000 e de feito durante parte da noite electoral o último escano bailou entre BNG e Vox, polo que se mellorase de maneira significativa eses resultados aínda que non de forma esaxerada Vox si podería competir. 

En Pontevedra o mínimo para entrar na repartición hai catro anos foi de 50.000. Nas locais Vox sacou só 6.700. Nas pasadas xerais, 38.000. A melloría da ultradereita en Pontevedra para poder competir debería ser por tanto moi notable.

En definitiva, se Vox ten algunha opción en Galicia, debería ser na provincia da Coruña. Na Coruña sería un dos territorios nos que o Partido Popular ten opcións segundo as enquisas de arrebatarlle un e mesmo dous escanos ao Partido Socialista. Por tanto, A Coruña debese ser o campo de batalla no que os partidos gasten máis esforzo na inminente campaña.
 

GRUPO PROPIO PARA O BLOQUE NO CONGRESO?

O BNG preséntase a estas eleccións coa aspiración de conseguir grupo parlamentario propio para o que necesita polo menos cinco deputados.  Parece case imposible que os nacionalistas o consigan se non logran desafiar ás enquisas e arrincar polo menos un representante nas provincias de Lugo e Ourense. 

Algo do que os nacionalistas poderían non estar moi lonxe, de acordo a outra enquisa publicada polo Confidencial  en outubro que outorga aos nacionalistas máis do dez por cento en ambas as provincias. Ademais, teñen o precedente recente das eleccións locais, cando lograron unha cantidade de sufraxios que os sitúan moi preto do límite que houbo catro anos para conseguir a última acta que se reparte mediante a Lei D’Hont.

Hai que lembrar que para conseguir un escano necesítase polo menos  lograr o 3% nun distrito electoral, en cada provincia. Os que non logren esa porcentaxe non entrar na repartición, os seus números nin se meten á hora de calcular a Lei D'Hont. O que non quere dicir nin moito menos que un 3% garanta lograr representante.