Extinguido o incendio de Oímbra; estabilizados os de Entrimo e Crecente
Setembro arrincou coa peor vaga de incendios no que vai de verán, con tres días nos que o terreo calcinado cóntase por máis de medio milleiro.
A Consellería do Medio Rural deu por extinguido o incendio forestal que afectaba desde a pasada noite ao municipio ourensán de Oímbra, e que queimou case 27 hectáreas.
Este lume puxo en risco durante a noite unha granxa con depósitos de combustible, polo que os efectivos se concentraron nesa zona. A alcaldesa, Ana Villarino, confirmou que a instalación se "salvou" e que tampouco houbo afectación a vivendas.
Na súa extinción, explicou a Xunta, traballaron sete axentes, 14 brigadas, 12 motobombas e dúas pas.
CONTROLADO O LUME DE ENTRIMO
Pola súa banda, o lume rexistrado no municipio ourensán de Entrimo, parroquia de Venceáns, quedou controlado tras queimar unhas 200 hectáreas no Parque Natural Baixa Limia - Serra do Xurés.
Este incendio iniciouse o martes en Portugal e entrou en territorio galego ao redor das 17.00 horas do mércores, día 4. Nos labores de extinción participaron, até agora, seis técnicos, 30 axentes, 56 brigadas, 22 motobombas, catro pas, 10 helicópteros e 11 avións.
Finalmente, o incendio da localidade pontevedresa de Crecente continúa estabilizado tras afectar a unhas 300 hectáreas de terreo. Xa está desactivada a Situación 2, que se puxo en marcha ao comezo do lume pola súa proximidade a núcleos de poboación, algo que obrigou a desaloxar momentaneamente a unha vintena de persoas.
Os equipos da Xunta atoparon indicios de que este incendio, que comezou ás 22,30 horas do mércores, foi intencionado. Para a súa estabilización mobilizáronse, até agora, cinco técnicos, 36 axentes, 65 brigadas, 47 motobombas, seis pas, nove helicópteros e cinco avións.
A PEOR VAGA DE INCENDIOS DO ANO
Desde que o mércores o lume entrase a Entrimo desde Portugal vivíronse tres días nos que os incendios causaron a peor onda deste ano, con máis de 520 hectáreas de terreo calcinado.
Até este momento, o mes máis afectado polas chamas en Galicia este 2024 fora o de abril, no que arderon 450 hectáreas. En todo o mes de agosto queimaron unhas 230 hectáreas de terreo.
Escribe o teu comentario