Gadis volve ser exemplo da creación de emprego sostible con máis de 8.500 profesionais

En cuestión dun lustro, Gadisa Retail xerou ao redor dun milleiro de empregos. Son unhas cifras máis que considerables que aúpan á marca como unha das compañías galegas que máis emprego crea, con 342 durante o último ano. A captación de talento e o emprego estable e de calidade son parte do selo dunha firma 100% galega que non deixa de crecer e que xa está composta por 8.558 profesionais ao peche do último ano.

"Avanzar cara ao futuro con solidez e prosperidade é o seu propósito para aumentar o impacto positivo a través da sustentabilidade económica, social e medioambiental", din desde os supermercados Gadis, onde pon énfases no "valor engadido" que supón a "atención personalizada" que dispensa a compañía aos seus clientes, con dependentes nas seccións de produto fresco para unha mellor experiencia dos compradores. 

"Perfís moi especializados que ofrecen, á súa vez, un trato de calidade e marcado pola proximidade aos seus clientes", detallan. Con todo, non é o único alicerce da política de Gadis, que ten como obxectivo a captación e a retención de talento, tanto mozo como senior en distintas feiras de emprego e xornadas de captación laboral, así como a formación e promoción interna "para o crecemento persoal e profesional de todas as persoas que forman parte da organización".

"Os plans para potenciar as habilidades dos traballadores e enriquecer a súa bagaxe formativa alcanzaron a 3.064 persoas en 2023, ano no que 89 alumnos de formación ocupacional realizaron prácticas empresariais nas diferentes seccións e nas caixas. Isto supuxo unha oportunidade laboral para as persoas que se incorporaron ao persoal da compañía grazas a esta formación", abundan desde a compañía, onde moitos deses profesionais que se forman nos establecementos terminan quedar como parte do persoal.