O Corte Inglés da Coruña acolle o ciclo de catas da 'Cervezoteca'

Loura, negra, tostada... Non importa a forma, a cor ou o tamaño, porque nun día de verán como o de hoxe unha cervexa ben fresquita entra ben de calquera xeito. Sábeno os mestres de Fillos de Rivera, que veñen de inaugurar a 'Cevezoteca' no Corte Inglés da Coruña, que servirá como sede para unha serie de catas desta bebida milenaria. 

O proxecto da 'Cervezoteca' incorpora unha llenadora e Growlers, "unha iniciativa que permite aos usuarios recargar os seus propios envases con cervexa fresca para consumir nos seus fogares". "Dispoñibles en diversos tamaños, estes Growlers fomentan a reutilización e redución de residuos, ofrecendo aos amantes da cervexa unha maneira práctica e ecolóxica de gozar da súa bebida favorita desde casa", destacan desde a cadea de grandes almacéns no seu comunicado.

Para unha mellor experiencia, no centro comercial herculino están a programar unha serie de citas para os máis cervexeiros de face a descubrir da man dos expertos todo o relativo á cultura da cervexa nunha experiencia sensorial para redescurbir todos os matices das distintas variedades de Estrela Galicia. 

Catas a cegas, cervexas de importación ou probas para ver cal é o sabor preferido dos asistentes foron algunhas das propostas do pasado 18 de xullo, mentres que xa hai programada unha segunda cita para o 2 de agosto con motivo do Día Internacional da Cervexa e unha última o 12 de setembro. "A participación é gratuíta e as prazas son limitadas. Para asistir hai que inscribir previamente no correo: eventosacoruna@elcorteingles.es", detallan os organizadores.

No entanto, en Fillos de Rivera e O Corte Inglés tamén pensaron nos abstemios, polo que dispoñen dunha liña de AUARA, a marca de auga solidaria da que forma parte a compañía e que, entre outras iniciativas, proxectan construír un pozo en Poussouloute, Benín, para axudar á poboación local para o consumo deste recurso tan escaso nalgunhas zonas do mundo.