O comité de empresa de Alcoa pide unha reunión "ao máis alto nivel" co Goberno central

A conselleira de Economía e Industria, María Jesús Lorenzana, reuniuse este venres co comité de empresa de Alcoa e, xuntos, esixiron á empresa que complete os requirimentos medioambientais que lle faltan e ao Goberno central que "atenda" as necesidades enerxéticas da compañía, "como se comprometeu".

Así o expresaron esta tarde tanto a conselleira como o presidente do comité, José Antonio Zan, que compareceron ante os medios para dar conta dos asuntos tratados na reunión.

Entre eles, o expediente da balsa de lodos vermellos, agora en tramitación. Tal e como apuntou a conselleira, o recrecido da balsa é "esencial" para a actividade da planta.

"Aproveito unha vez máis para reclamarlle a Alcoa que complete os requirimentos da Xunta. De feito, acordamos na reunión facer un novo requirimento (...). Agora mesmo está en mans de Alcoa completalos para que poidamos autorizar o recrecido da balsa, por suposto, con toda a tramitación ambiental complexa que isto supón, para que exista un futuro para a continuidade da actividade de Alcoa", aseverou.

Lorenzana insistiu en que a compañía "ten que ser seria" co expediente e así, "manifestar a súa vontade de querer continuar coa súa actividade, de continuar traballando en Galicia".

"ATENDER" As NECESIDADES ENERXÉTICAS DE ALCOA
Respecto ao tema enerxético, reiteraron a urxencia de que o Executivo central "cumpra" o seu compromiso de "atender as necesidades enerxéticas" da empresa.

A conselleira lembrou que todos os parques eólicos que dan subministración a Alcoa, competencia da Xunta, están autorizados -- "menos un que xa ten declaración de impacto ambiental" --, polo que esixiu, concretamente á Ministra de Transición Ecolóxica, que "dea cumprimento á súa palabra" cando dixo que daría solución a aqueles parques eólicos cuxos permisos de acceso e conexión decaeran.

A este respecto, indicou tamén que debe modificar o estatuto para as empresas electrointensivas. "O tema enerxético é crucial para que Alcoa ou un eventual comprador poida continuar con esta actividade", remarcou. Ademais, avanzou que acudirán a calquera reunión que se lles convoque e reiterou o seu apoio ás familias da zona.

REUNIÓN Ao MÁIS ALTO NIVEL 
Precisamente, José Antonio Zan referiuse a esa próxima reunión que solicitarán "ao máis alto nivel", concretando na vicepresidenta e ministra de Transición Ecolóxica e no ministro de Industria. Ademais, solicitou o apoio da Administración galega, especialmente do presidente, Alfonso Rueda.

O presidente do comité pediu a todas as partes "máis axilidade", "dado que está o persoal nin a comarca en moi bo ton". "Levamos catro anos sufrindo unha tortura continua e permanente. Volvemos ver que non entregan documentacións necesarias para o futuro da planta e sobre todo, unha mala fe ao asinar un acordo que din que non van cumprir", censurou.

Zan foi máis aló e falou do "atraco" que Alcoa está a cometer contra os seus traballadores, a comarca e toda Galicia ao tratar dun "sector estratéxico" como é o do aluminio.

"Non podemos depender un país enteiro de que unha multinacional se siga rindo á nosa costa (...). Sobre todo, que dunha vez por todas, cumpra co asinado. E si non, que a Xunta, a través do Igape, apoie a intervención da empresa e que o Goberno de España déixese dunha vez por todas de marear a miles de persoas e coxa o touro polos cornos", animou.