Xa se poden solicitar os abonos gratuítos de Renfe para Proximidades e Media Distancia, cunha fianza de 10 euros

Como mínimo, os beneficiarios desta medida deberán realizar 16 viaxes entre o 1 de setembro e o 31 de decembro. 

A fianza pagarase no momento no que se adquira este novo bono especial creado para estes catro meses, que será unipersoal.

Renfe abrirá este luns o rexistro na súa web para que os clientes poidan solicitar o abono gratuíto, que comezará a funcionar a partir do 24 de agosto para os trens de proximidade, Rodalies e Media Distancia.

Este rexistro é necesario para que os viaxeiros frecuentes ou recorrentes destes servizos poidan adquirir o seu novo abono, bonificado ao 100%, segundo sinalou a compañía a Europa Press.

O rexistro estará aberto a través da propia web de Renfe e do conxunto das súas aplicacións.

O pasado 12 de xullo o presidente do Goberno, Pedro Sánchez, anunciou que o Goberno bonificará o 100% dos abonos de varias viaxes para Proximidades, Rodalies e trens de media distancia operados por Renfe, polo que pasarán a ser gratuítos desde do 1 de setembro ata o 31 de decembro deste ano.

FIANZA DE 10 EUROS E VIAXES MÍNIMAS

O Executivo restrinxiu a gratuidade destes trens aos usuarios que realizan estes traxectos habitualmente, a través dunha fianza cuxa devolución estará supeditada á realización dun mínimo de 16 viaxes ao longo dos catro meses que durará esta medida.

A posibilidade de viaxar gratis nos trens de proximidade requirirá dunha fianza de 10 euros, mentres que nos trens de Media Distancia ascenderá a 20 euros.

Se se realizaron máis de 16 viaxes devolverase esta fianza, de forma automática se se pagou con tarxeta de crédito ou a través dunha solicitude presencial do usuario se se abonou por medio de diñeiro en efectivo.

A fianza pagarase no momento no que se adquira este novo bono especial creado para estes catro meses, que será unipersoal, é dicir, só poderá usalo unha persoa, e para un traxecto en concreto.

Desta forma, o sistema desenvolvido evita que os fondos destinados a esta medida vaian parar a usuarios ocasionais que só pretenden desprazarse en tren unas cantas veces por motivos de lecer.