O Celta sela o seu pasaporte á Europa League tras dobregar ao Sevilla en Balaídos

O Celta puxo o broche de ouro á súa gran tempada gañándolle ao Sevilla cun tanto de Ilaix Moriba e certificando a súa presenza por segundo ano consecutivo na Europa League. Ao Celta valíalle un empate para clasificar, pero logrou o reto pola porta grande: venceu ante o Sevilla (1-0) nun estadio de Balaídos entregado na noite deste sábado. Os celestes conseguen, así, acceder a competición europea por segundo ano consecutivo tras terminar sextos con 54 puntos (un menos que o curso pasado, pero unha posición por encima), unha fazaña que a entidade celeste só lograra nunha ocasión.

Un Sevilla respondón na primeira metade

A cita no feudo celeste comezaba cunha dose extra de ilusión ao figurar Iago Aspas, recentemente renovado por un ano, na aliñación de partida, sendo o único cambio no once do Celta. Claudio Giráldez decidiu apostar polos seus valores máis seguros das últimas xornadas.

A contenda comezou cun susto tras unha perda de Yoel Lago e unha cabalgada sen remate do hispalense Peque. A continuación, o Celta mandou dous avisos serios con sendas galopadas de Javi Rueda, quen foi un dos máis destacados da metade inaugural —e de boa parte do choque—, chegando a levantar á afección tras conseguir dous caños. Só el foi unha dor para un Sevilla que, liberado das súas ataduras, chegou a Balaídos con ganas de reivindicar. No entanto, a ocasión máis clara do Celta en toda a primeira metade foi un córner rematado por Marcos Alonso que se foi alto.

A medida que caían os minutos, o Sevilla afianzouse, tivo o balón, presionou ben e Azpilicueta negou a saída celeste en busca de Borja Iglesias. Os vigueses, que fallaron máis pases do habitual, fóronse distanciando da área rival para vivir diante da súa, demasiado afundidos nun bloque baixo e permitindo remates ao lateral da rede de Peque e Isaac. No minuto 44, o veterano Alexis Sánchez case lle provoca un infarto a máis dun: recolleu de socato un centro desde o flanco dereito tras gañarlle a partida e as costas a Yoel Lago, pero apareceu un Radu impecable para frear o coiro e sacalo dun modo efectivo coa súa bota.

Revolución tras o descanso e gol de Ilaix Moriba

A charla de Giráldez no tempo de refresco provocou un efecto inmediato. A segunda metade foi outra cousa: o Celta transformouse por completo, saíu máis enchufado e intenso e comezou cargando o xogo pola esquerda por un Sergio Carreira moito máis pegado á liña de cal. Si na primeira metade Luís García detectara o seu xogo próximo ao carril central, na continuación o vigués foi un puñal. Seu foi un pase atrás con todo a favor que Fer López estrelou nun rival e, un minuto despois, gozou dunha ocasión evidente cun elegante tiro ao pau desde moi lonxe; de tocar as mallas, sería un golazo digno dun '10'.

Quen acertou en plena onda celeste foi Ilaix Moriba. O centrocampista recibiu dun moi activo compañeiro e executou un forte e potente disparo desde fóra da área (desde a súa casa); o balón tocou no defensor visitante Carmona, botou xusto diante de Ørjan Nyland e acabouse coando no fondo das mallas. Podía facer algo máis o gardameta, aínda que é certo que o bote previo complicoulle a tarefa.

Un vendaval celeste sen sentenza

Co 1-0, o Celta desarboló aos hispalenses e tivo uns minutos deliciosos, con ocasións e sen gol, polo que o resultado final queda curto para a colección de ocasións viguesas, que deberon sentenciar moito antes. Os celestes presionaban alto, roubaban balóns e plantábanse na área rival con facilidade. Javi Rueda chegou á liña de fondo, pero o seu centro foi demasiado alto.

No minuto 55, os celestes puideron finiquitar a tarefa: Iago Aspas rompeu a defensa e fixo unha boa internada para deixar un balón en bandexa —algo longa— a Borja Iglesias, en posición de, simplemente, empuxala, pero o picheleiro non foi capaz de alcanzala. Tan só segundos máis tarde, unha entrega en falso do Sevilla na retagarda acabou nas botas de Williot Swedberg tras un roubo moi alto de Fer López, quen lle entregou a pelota con todo a favor, pero o sueco marró diante do gardameta e o seu disparo cruzado non entrou por centímetros.

Diluvio e festa final en Balaídos

A continuación comezou a caer o diluvio sobre Vigo e chegou a pausa de refrixeración. O Sevilla volveu crecer na recta final despois de ser sometido polo cadro vigués, provocando un susto con Radu tras unha saída. Con todo, o porteiro romanés cortou cunha boa intervención a chegada hispalense. Para entón xa non estaban no campo nin Iago Aspas nin Fer López, os dous magos do balón.

Na recta final, o Celta volveu defenderse co balón e tivo o control do partido. Mesmo Pablo Durán tivo a sentenza nunha contra, pero disparou moi brando.

Ao final, o feudo celeste toleou no último tramo do partido con varios cánticos da casa e cunha celebración grupal cos xogadores tras o asubío final. Incluso o tempo tivo a súa graza ao pasar de longo as tormentas anunciadas para a tarde.